En 1856, una enorme esplosión sobro Uviéu dio llugar al descubrimientu de dellos fragmentos d’un meteoritu que fueron recoyíos en Fozaneldi, y de los qu’entá se caltienen dos, en Madrid y en París.
Asocedería munches vegaes antes, pero lo cierto ye que la primer vegada que se documentó la cayida d’un meteoritu n’Asturies foi’l cinco d’agostu de 1856. Y como pa non documentalo: el fenómenu xeneró tanta espectación na ciudá que s’escribió enforma, y bien refechamente, sobre aquel cuerpu estrañu que, nun principiu, creyóse que yera… una bomba.
Lliteralmente: asocedió a eso de los seis de la tarde, dexando sentise en tola ciudá un ruiu tarrecible y pa toos estrañu, que proviniendo de l’atmósfera en nada se paecía a los truenos ordinarios”, escribiría, años dempués, José Ramón Lluanco. Daqué que paecía una esplosión -los más escépticos supunxeron que dalguna prueba ordinaria na Fábrica d’Armes-.
Foi al atopase dos talos fragmentos del meteoritu a otru día cuando se supo qu’aquel fuera, más bien, un fenómenu astronómicu. L’encargáu d’investiglo foi Luis Pérez, coles mesmes caderalgu d’Hestoria Natural na Universidá, qu’alcontró siquier cuatro roques procedentes del aerolitu: dos que travesaren los teyaos d’un par de cases, unu qu’aterrizó nun prau allegante y otru cayíu un pocu más allá, toos ellos en Fozaneldi. Documentaronse tamién visiones de piedres cayendo dende’l cielu en La Cadellada y en Ventanielles; en Sotu’l Barcu y en La Ribera, y entá güei caltiénense, en Madrid y en París, dos pequenos fragmentos recoyíos aquel día equí y acullá.
Sobre aquelles piedres*granuxientes, del tamañu d’un güevu grande, qu’escondíen un corazón metálicu y faltaben abondo de ser precioses -pero sí, en concencia, espaciales… y especiales- escribióse tamién nos nuesos díes. Yá lo ven: el cielu tampoco s’escaez d’Asturies cuando decide ruxir sobre la tierra.
