Publicado en Poesía

Poema: «Cuestión de llingua 2.0»

Autora: Claudia Elena Menéndez Fernández

Baxo’l claru sol d’iviernu
véote con pena como tolos díes
esclucando dende cualquier requexu;
vas per ehí tatexando pallabres d’ausiliu
como un pexe que da les últimes boquiaes…

Poca xente amira por ti,
fai tiempu que lleves la soga al pescuezu,
maltrátente como a nenguna
y espétente’l cuchiellu de la indiferencia.

Amoriando pente les cais,
siéntesete falar dacuando
con voz afogadino y baxo,
pero cada día que pasa
ye una pala más de tierra
enriba’l to cuerpu de furacos.

Acolúmbrente con mecigaya
de vergoña y compasión
y dalgunos quixeren vete muerta…

Pero yo llévote conmigo au quieras
llévote a ver el mundu,
que te sientan falar con arguyu
que pa mi tas más viva que nunca.

Autor:

Maestra de Llingua Asturiana Colexu Carmen Ruiz-Tilve - Uviéu