Publicado en Sin categoría

La marea de la oficialidá desborda la cai Uría d’Uviéu

La marea de la oficialidá desborda la cai Uría d’Uviéu

La esixencia d’un estatus dignu pa los dos idiomes oriundos d’Asturies moviliza a miles de persones nuna manifestación histórica de la Xunta pola Defensa de la Llingua Asturiana.

En metá de les negociaciones sobre la reforma del Estatutu d’Autonomía y la posibilidá d’inxertalu como llingua oficial

La cai Uría, con un kilómetru de llargor, quedó pequeña pa encauzar la marea humana qu’esti mediudía percorrió Uviéu en defensa de la oficialidá del asturianu y del gallego-asturiano. La manifestación, convocada y organizada pola Xunta pola Defensa de la Llingua Asturiana, bien merez el calificativu d’hestórica, pola rempuesta ciudadana y porque, si va p’alantre nel Parlamentu asturianu’l procesu llexislativu de reforma del Estatutu d’Autonomía p’Asturies, habría de ser la cabera movilización d’esta triba.

Tampoco bastó la superficie de la plaza de la Catedral, puntu final d’una marcha que empezara delantre de la Estación del Norte, p’agospiar a les persones participantes na movilización, llegaes dende toa Asturies, dende el País Lleonés y dende otros territorios del Estáu (asturianes y asturianos emigrantes garraron el tren o l’avión dende diferentes destinos pa tar güei n’Uviéu, según atestiguaron nes redes sociales).

Minutos enantes de que la marcha echara a andar pela cai Uría, la conseyera de Cultura, Política Llingüística y Turismu, Berta Piñán, señaló a la montonera de periodistes de medios asturianos y estatales que cubríemos l’actu, que “lo que la ciudadanía vien a dicir güei equí ye un sí a la oficialidá del asturianu nesti contestu tan favorable y con esta voz cuasi unánime d’una Asturies que ta glayando por una oficialidá de consensu, una oficialidá que fai pie y pon el puxu nos derechos, non nes obligaciones. Esa ye la oficialidá que venimos a reivindicar equí y que yo, como ciudadana y como conseyera, vengo a apoyar”.

/

Berta Piñán participó na manifestación acompañada por Antón García, director xeneral de Política Llingüística, y por María Luz Pontón, secretaria d’Educación, Universidades y Normalización Llingüística de la Federación Socialista Asturiana (FSA).

/

Na plaza de la Catedral, onde nun cabía nin un anfiler, l’actriz y presentadora de televisión María Cotiello y el meteorólogu de TPA David Arango lleeron el comunicáu de la Xunta, qu’esplicaba que “un corazón de colores ye la imaxe de la nuestra campaña. Quier ser un símbolu del ciñu que-y tenemos al nuestru patrimoniu llingüísticu, pero tamién un símbolu de pluralidá, de bayura cultural. El mundu ta enllenu de comunidaes multillingües y eso nun tien que ser nengún problema. Al revés, ye una riqueza. Namás ye un problema pa los intolerantes, pa los de mentalidá escluyente, pa esos que s’espreceten y avisen de catástrofes apocalíptiques si s’aprueba la oficialidá”.

/

Punxeron el ramu d’esta movilización el DJ Fruela 757 y el cantante Rodrigo Cuevas, qu’enantes d’empezar resumió la llarga espera de les y los falantes d’esta llingua comentando que “ye bon momentu pa declarar la oficialidá, pero meyor momentu yera va cuarenta años”.

/

“El corazón de colores ye un símbolu de pluralidá. El mundu ta llenu de comunidaes multilingües y eso nun ye nengún problema. Solo ye un problema para los intolerantes”, aseguren.


Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *