Santirso ta al mandu de esti negociu que se convirtió en seña d’identidá del cascu antiguu de la capital asturiana. L’orfebre denuncia la situación pola que ta pasando l’acebache asturiano y reclama que se ponga en valor esti material autóctono.
Corría l’añu 1927 cuando Manuel Santirso Alonso entró a trabayar con tan solo 13 años n’una xoyería d’Uviéu. Tres trés décades aprendiendo l’oficiu d’orfebre, l’uvieín decidió montar una tienda para vender les sos propies xoyes. Sol nome de Xoyería Santirso abrió les puertes d’un local na plaza de la Catedral en 1960. Un negociu al que s’incorporó’l so fíu Florentino, más conocíu como Tinu, quien en instruyéndose col so proxenitor decidió entamar pola so propia cuenta en ficies de que el negociu familiar pudiera perdurar nel tiempu. «Tábamos d’arriendu y sabíamos que tarde o aína teníamos que colar d’ende», asegura l’artesanu, antes de señalar que pa ello se camudó n’ochobre de 1985 a un baxu na cai Rúa. Dende entós non solo caltuvo’l legáu del so padre, sinón que fixo que la so orfebrería sía xuna de les más representatives de la capital, cuidao que ye de les poques que trabayen l’escasu acebache d’orixe asturianu qu’entá queda.
Asina lluz la entrada de Xoyería Santirso, n’Uviéu
En Xoyería Santirso ellaboren y preparen xoyes con acebache. «Colo qu’antes refugabes, agora tienes que buscate la vida y tamién íguenles pa faer pieces pequenes porque grandes yá ye imposible», llamenta Tinu Santirso, quien denuncia «la vergonzosa» situación pola que ta travesando esti material n’Asturies. «Non solo nun se da a conocer esti mineral autóctonu que ye consideráu de lo meyor del mundu, ye que de mano non se ta nin estrayyendo. El Principáu dio una concesión a una empresa o una persona y ta paráu porque se conoz qu’echó númberos y nun-y interesa’l negociu, pero a lo último lo que se ta faciendo ye perder puestos de trabayu. Si la mina arrinca crearíense empleos y nós igual podríamos xenerar dalgunu, yá que podríamos enseñar l’oficiu a les nueves xeneraciones, cuidao que se tán morriendo los artesanos bonos, qu’esos sí pueden aprender a la xente a tallar», clama.
Nesti puntu’l propietariu de la Xoyería Santirso pon por casu a un artesanu gallegu col que caltenía una bona relación. «Alcordanza que m’atopaba enforma con él en Madrid, a onde díbamos a dalguna qu’otra feria. N’una d’aquelles conversaciones díxome que metiera dos chavales a trabayar y pregunté-y por qué. Comentóme que nun-y costara nada porque taba tou pagu pola Xunta —entós daquella, gobernada por Manuel Fraga— cola única condición de qu’en dos años fueren oficiales», señala Tinu Santirso, antes d’esclamar que «ende ta la clave, yá que asina l’oficiu perduraría nel tiempu».
Oxetos tallaos n’acebache. Fabricáronse nel taller de la Xoyería Santirso
«De fechu en Galicia, na Escuela d’Arte, según tengo entendíu tienen un catedráticu especializáu na talla d’acebache», prosigue’l xoyeru, quien llamenta que n’Asturies p’aprender esti oficiu hai que faelo con un artesanu que te dea clases y puedas aprender como se fixo siempres: sentáu al llau, mirando y faciéndolo». Lo cierto ye que trabayar con esti material que provien de la madera fosilizada nun ye xera fácil cuidao que ye fráxil y duru coles mesmes. Pa poder crear obres d’artes con él ríquese maña, dedicación y paciencia, cuidao que pa consiguir una superficie ensin poros y col so particular rellumu, el procesu qu’hai que siguir ye llargu y complexu.
Ellaboración, vienta y arreglu de too tipu de xoyes
Sicasí, pa Tinu Santirso ye como coser y cantar. Dempués de más de 50 años dedicándose a la orfebrería, l’uvieín tien la técnica más que controlada. Ye por ello que la mayoría de les xoyes que se vienden na Xoyería Santirso tán feches nel taller que tienen na mesma tienda, onde amás se faen arreglos y ellabórense pieces d’oru y plata. «Tamién nel casu de que’l veceru quiera dalgún diseñu concretu pos se-y fai. Eso nun quitarque merquemos, pero’l mio principal oxetivu ye dar salida tolo máximo posible al estocaje que tenemos», cunta l’artesanu, quien reconoz que los productos estrella son los ellaboraos con acebache, les medayes y les cadenes.
Cacía de plata que lluz nes vitrines de la xoyería Santirso
