La Benéfica, el suañu de Rodrigo Cuevas pa dinamizar un pueblu, empieza a andar.

Ye un día mui importante y nun queremos dexar a naide fuera

 

El cantante, compositor y folclorista Rodrigo Cuevas dio güei’l primer pasu del proyectu qu’impulsa en L’Infiestu pa recuperar como espaciu cultural y d’acción comuñal que sirva pa lluchar escontra la despoblación un vieyu inmueble hasta agora abandonáu que, gracies al financiamientu popular, inauguró yá la so primer fase.

Tres dos años recaldando fondos, Cuevas amosóse güei satisfechu por poder llevar alantre yá les obres de rehabilitación del teyáu, l’escenariu y l’almacén del edificiu, construyíu en 1926 y concebíu orixinalmente como teatru, cine y sala de bailles, pa «pagar» con una fiesta d’inauguración «la delda pendiente» coles persones qu’apurrieron fondos.

El mesmu Rodrigo Cuevas anunció, al entamu del actu, que lo que más quier facer nesi espaciu son «bailes de xubilaos». «A min», dicía l’axitador folclóricu, «nun hai nada que más me guste que mezclar la xente. Xubilaos y xente que nos queremos xubilar».

«Ye como cuando los políticos inauguren los hospitales y nun pue entrar una cama dientro, polo menos sírvenos pa creer que pue funcionar», bromió al entamu d’una xornada qu’inclúi música, danza, teatru y artes visuales, abierta al públicu y con especial atención a neños y persones mayores como los usuarios de la residencia de vieyos cabo La Benéfica.

D’esa manera, l’inmueble de 1926 concebíu orixinalmente como teatru, cine y sala de bailles recupera la so vocación cultural de la mano de l’asociación integrada por Rodrigo Cueves, Nachu Somovilla y Sergi Martí. «Volvemos reactivar La Benéfica cola mesma ilusión que va cien años», afirmó Martí. Sorrayó amás qu’una iniciativa tan ambiciosa no cultural y lo comuñal «nun la monten trés persones», sinón «tola xente que ta creyendo y collaborando». Para Rodrigo Cueves l’aspiración ye la de siguir l’exemplu de La Benéfica orixinal, que fai yá un sieglu entendió que «la cultura ye más que l’arte, ye’l progresu y la conocencia».

La propia historia del edificiu y la so situación na capital del conceyu de Piloña son mui significatives pa comprender la iniciativa que garraba camín ayeri: como esplicó la historiadora piloñesa Irene Faza demientres la gala qu’inauguró l’espaciu, la nave construyóse en 1926 y foi hasta 1946 sede d’una sociedá benéfica y de socorru mutuu, que funcionaba como una organización pa garantizar protección a los trabayadores, y na qu’había daquella proyecciones de cine, representaciones de teatru o cursos. Anque depués foi una fábrica de duces na que les trabayadores remembraben ganar 6 o 7 pesetes y entrar toles mañanes con xelaes, y acabó tresformada en garaxe de coches, el nome que remitía a la so actividá primera remaneció.

Esti espíritu primitivu escénicu y collaborativu d’hai cuasi un sieglu ye’l que quier recuperar anguaño l’equipu de La Benéfica, formáu pol músicu y axitador Rodrigo Cuevas; el trabayador social Sergi Martí y el xestor cultural Nacho Somovilla. Tres d’una exitosa campaña de micromecenalgu y de collaboraciones estremaes con empreses y organizaciones asturianes ya internacionales, Cuevas, Martí y Somovilla foron quien a cambiar el teyáu y remocicar l’antigua nave de la sociedá de socorru mutuu y tresformala nun espaciu que punxere en contactu la tradición cola modernidá más radical.

Asina pudo vese na gala cola que s’inauguraba’l teatru nel día d’ayeri y que reunió a dellos centenares de persones, mesmo dientro de la nave piloñesa como na pantalla na que se podía ver l’espectáculu dende fuera, como si se tratare d’una de les que permiten presenciar el festival d’Eurovisión a los eurofans que quedaron ensin entrada.