- Fonte: Iniciativa pol Asturianu /Facebook /
- Consulta les bases en:
https://bit.ly/41MjyMs - Sonia Uría gana’l concursu lliterariu ‘Ensin muyeres, nun hai idiomes’ cola obra ‘Llingua, respetu y remangu’
Llingua, respetu y remangu
Miraba pa les hermanes, o eso creyía, nun veía nada. Recolocóse los calzones a tientes, llimpióse la cara col mantu y comprobó una a una que taben toes xuntes. Ente aquelles cuatro muries namás se sucedíen les nueches. Carmen podría xurar qu’aquello yera un castigu, qu’esi barcu nel que un día montó yera’l culpable de too lo que-y asocedía, l’ausencia del pa, el miéu la ma, el silenciu, aquella nueche eterna.
Carmen pasaba los díes pensando nes nubes y nos praos que diba ver cuando prendieran la lluz, imaxinaba lleones en llibertá y copos de nieve. Mientres siguía suañando, sintió la puerta. Esta vez, nun quixo esperar a que volviera la escuridá. Garró la mano d’aquelles rapacines, que de vese unes a otres sabríen que teníen toes la mesma cara, y corrieron hasta pasar Ciares. Carmen nun pensaba en nada. Nun podía pensar. Pero imaxinaba la cara que taría poniendo la madre al ver a les trillices escapar. Yera un día lluviosu y escuru. Sonó un disparu non mui lloñe d’onde taben y Carmen, asustada, echó la vista atrás. Vio entós lo mesmo qu’antes, escuridá. El rostru de la ma siguía prietu, cubiertu de carbón. Y el mundu que l’arrodiaba paecía cayer a cachos.
Les tres hermanes escaparon ynunca tornaron a aquel horru ensin ventanes. Xuraron que siempre taríen xuntes, que nunca se separaríen. Tampoco nun culpaben a la madre porque sabíen que la vida yera difícil pa una muyer sola. Poro, les tres tuvieron ehí col pasu los años les uñes pa les otres, fuxendo del maríu d’una a Bélxica, emigrando p’Arxentina, tornando p’Asturies, y teniendo nietos. Asina foi como yo tuvi tres güeles, Carmen, Fina y Llibertá que m’aprendieron tolo que sé: llingua, respetu y remangu.
La obra ‘Llingua, respetu y remangu’ ye la ganadora del concursu lliterariu ‘Ensin muyeres, nun hai idiomes’, entamáu por Iniciativa pol Asturianu con motivu de la celebración del Día Internacional de la Muyer. El xuráu escoyó’l testu de Sonia Uría como’l meyor de los presentaos nesta segunda edición del concursu. El segundu premiu correspondióse cola obra ‘Estrelles d’acullá’ d’Alexia Fernández Moure, y el terceru a ‘Vístime güela’ de Xuan Ferreru.
Esta convocatoria trató de llograr una reflexón sobre la importante figura de la muyer como pegoyu onde deprendimos la nuesa llingua materna, fixándonos especialmente nesi idioma nel que viven, sienten y nos críen les muyeres que nos arrodien faciéndolo al traviés de la lliteratura; consiguiendo amás medrar notablemente les participaciones respeuto a la primer edición.
El xuráu d’esta segunda edición del concursu lliterariu ‘Ensin muyeres, nun hai idiomes’ entamáu por Iniciativa pol Asturianu tuvo compuestu por María Xosé Rodríguez de la Oficina de Normalización Llingüística de Xixón, María Antuña de Fórum Femenista, Claudia Elena Menéndez Fernández como directora de Formientu y Vpta. Iniciativa pol Asturianu; Yosune Álvarez coordinadora de XEGA, Aridane Cuevas presidenta del Conseyu de la Mocedá de Xixón y de Mil Voces Violetas; Blanca Fernández d’Iniciativa pol Asturianu y Jennifer Berrocal Expósito tamién d’Iniciativa pol Asturianu, faciendo esta última de secretaria del xuráu.
Iniciativa pol Asturianu quier agradecer toles participaciones a esti concursu que foi un homenaxe a toles muyeres que nos arrodien y a les que gracies a elles deprendimos asturianu.
