Publicado en Arte

Alfarería de Faro. Patrimonio d’Uviéu

L’artesanu Selito trabayando nel so taller de Faru. Semeya: Toño Huerta.

El xeógrafu Toño Huerta reivindica esta artesanía local, que’l sábadu celebró’l so día grande cola entrega del so premiu naual, el Barbón, al antropólogu Juaco López.

“…un actividá que, dende les instituciones públiques, nun podemos dexar qu’apeligre o que los sos artífices atopen ensin medios para la enseñanza y espardimientu d’un arte arrogante”. Corría l’añu 1995 cuando se celebraba la esposición Faru. Mil años de producción alfarera, y l’alcalde Gabino de Lorenzo dedicaba estes palabres nel prólogu del volume que s’editó. Pasaron 26 años, cuatro alcaldes y delles corporaciones y tou sigue igual. O inclusive peor pos, ¿cuánta xente d’Uviéu conoz la hestoria d’esta alfarería o tan siquier la so esistencia?

Botia, pieza tradicional de Faro. Semeya: Toño Huerta

L’actividá alfarera de Faru, siquier, ta constatada dende’l sieglu XI na so aguada negra, una característica que la fai única. Sería a partir del sieglu XIII cuando apaeciera la cerámica esmaltada, n’una dualidá qu’hai pervivido hasta los nuesos díes. La so dómina gloriosa, siquier dende’l puntu de vista cuantitativu, podemos afitala a mediaos del sieglu XVIII cuando esistíen más de setenta talleres alfareros. A partir d’ende un progresivu cayente apináu pola llegada de la industria locera fadría que, yá dende la segunda metá del sieglu XX tan solo perviviera el taller de Fornaxe de la mano de Lito y el so fíu Selito. Una saga que termina pero que, por fortuna, gracies a el llabor d’Orlando Morán, arqueólogu y aprendiz d’alfareru, l’oficiu va tener continuidá.

Faer qu’esti llabor ancestral sobreviva tendría de ser una obligación de la sociedá reflexada nun compromisu institucional. Allá pel añu 2014, siendo alcalde Agustín Caunedo y gracies al alcuerdu presupuestariu con Izquierda Xunida daba un pasu importante, la ellaboración d’un proyectu para la creación del Centru d’Alfarería de Faru, redactáu por quien suscribe esti artículu –a partir d’ese trabayo, la mio relación con Faru, la so alfarería y, sobremanera, la so xente, pasó de ser profesional a una amistá y compromisu que va creciendo col tiempu–. Sicasí, col proyectu redactáu, la siguiente corporación foi incapaz de materializar ese centro a pesar de los compromisos, l’asignación añu tres d’añu d’una cantidá nos presupuestos municipales y les promeses.

Sí llogró la firma d’un conveniu de collaboración cola Asociación d’Amigos de l’Alfarería de Faru a la qu’añalmente se -y otorga una subvención dende la Fundación Municipal de Cultura del Conceyu d’Uviéu para realizar el so llabor d’estudiu, protección y divulgación de la cerámica faruca; cola mesma hanse realizáu diversos estudios, editóse un catálogu, un documental o realizáu unes xornaes históriques y patrimoniales, por citar tan solo dalgunu, anque ye la otorgación del Premiu Barbón de Faru, del que depués vamos falar, l’actividá más entrañable, tollo ensin perder de vista l’oxetivu de ver realizáu un Centru d’Alfarería que dexe dar continuidá a esti llabor, centru que taría sofitáu en cuatro pilastres básiques: siguir siendo un taller d’alfarería, cuntar con actividaes de formación a tolos niveles, siguir col estudiu histórico y arqueolóxico de l’alfarería y sopelexar la so hestoria al traviés d’un discursu museográficu. Amás de nun perder una actividá única, convertirase nun centru dinamizador d’esta zona rural, un recursu endóxenu llenu de nueves oportunidaes.

Entrega del Barbón de Faru a Juaco López

Más de 25 años dempués de les palabres de De Lorenzo, l’actual alcalde, Alfredo Canteli, manifestó en delles ocasiones el so compromisu para llevar a cabu’l proyectu de Centru d’Alfarería; esperemos que les mesmes veanse ratificaes nos presupuestos del próximu exerciciu. Entrín y non, y frutu tamién del trabayu de l’Asociación d’Amigos de l’Alfarería de Faru, dende la Dirección Xeneral de Patrimoniu Cultural del Principáu d’Asturies tase a puntu d’incoar espediente de protección de los elementos, materiales ya inmateriales, amestaos a esti oficiu y qu’entá perduren en Faru en forma de fornos, casqueros y tradición; tan solo falta que dende la conceyalía de cultura contesten a los requerimientos de los técnicos del Principáu.

Dicía primero que xuno de los eventos más queríos ye la concesión del Premiu Barbón de Faru –el barbón ye una de les pieces más emblemátiques de Faru; un xarrón de trés rustes que se fabrica tantu na so aguada negra como esmaltada–. Esta reconocencia sirve para valorar el trabayu que diverses persones o entidaes faen na defensa de la cultura tradicional asturiana polo xeneral y de l’alfarería de Faru en particular.

En 2021 celébrase la so séptima edición y el galardonáu anguaño foi Juaco López, director del Museu del Pueblu *d’Asturies. Como cada añu, l’actu d’entrega del Barbón ye un día de celebración onde siguimos dando a conocer l’alfarería faruca, regalando a los asistentes, como yá ye costume, una reproducción de dalguna de les pieces tradicionales de Faru. Pero tamién, y sería imperdonable que nun fora asina, ye un día de reivindicación, porque toca recordar a les autoridaes presentes el so compromisu y la falta de fechos; la necesaria urxencia de materializar un Centru d’Alfarería énte’l peligru real de qu’esti llabor suma.

Mientres escribo estes llínees, n’Uviéu, na urbe, celébrase San Mateo y ente les actividaes infantiles hai un taller d’alfarería. Sía por desconocimientu o por descoordinación de la conceyalía responsable y los sos técnicos el casu ye que Faru quedó de llau nesi llabor tan necesariu pa sopelexar la nuesa cultura ente los más pequenos. Posiblemente pueda iguase nun futuru, pero nun dexa de ser llamativu qu’esista xuna collaboración cola Fundación Municipal de Cultura, que tengamos un alcalde comprometíu de palabra, inclusive que’l regalu institucional de les bodes civiles celebraes nel Conceyu sía xuna xarra de sidra de Faru y que, sicasí, la so alfarería quédese fuera de la programación mateina. A lo último, l’alfarería de Faru ye tamién la d’Uviéu, ¿cuántos conceyos podríen presumir de tener un oficiu con más de mil años d’hestoria?

Como suel asoceder en tantes ocasiones y con tantos elementos patrimoniales, l’alfarería de Faru ye más conocida y valorada fora de les nueses fronteres. Dende l’añu pasáu, a falta d’una decisión del Conceyu d’Uviéu pa formar parte de l’Asociación Española de Ciudaes de la Cerámica, qu’esperemos tome llueu, l’Asociación d’Amigos de l’Alfarería de Faru integróse nesa rede de conceyos l’añu pasáu, de manera escepcional y como reconocencia a la so hestoria, lo que de la mesma implica tar dientro de la Rede Europea de Ciudaes Alfareres. Un pasu más d’esti modestu grupu de xente que se niega a ver sumir una tradición milenaria énte la desidia institucional, onde primen les bones palabres frente a los fechos.

Esperemos que la misteriosa páxara que tantos caciplos decora siga volando énte toos nós, que nun sía solamente una alcordanza. Como sociedá tenemos la obligación moral de caltener el nuesu legáu, que ye lo mesmo que dicir la nuesa memoria. El Centru d’Alfarería de Faru vendrá llograr esos oxetivos; llevamos munchos años percorríos y toi seguro, nun puede ser d’otra forma, que vamos ver realizáu esti suañu. Faru y la so alfarería nun pueden morrer.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *