Publicado en TIEMPU

Vienres 26 de payares 2021

ESTÁU DEL TIEMPU Y PREDICIÓN.
Alborecemos col cielu cubiertu y dellos xarabatos intermitentes que son más intensos y persistentes nel interior y cordelera onde nieva copiosamente. Les temperatures tan alrodiu de los 7ºC y nel puirtu Payares rexistren -1,5ºC y se fae obligatoriu l’usu de cadenes o neumáticos d’iviernu, tando peslláu pa camiones.
Güei van dir a menos les precipitaciones con apertura de dellos claros nes hores centrales del día y un descensu de les temperatures con una cota de nieve qu’oscilará ente los 800-1000m. Al escurecer cola llegada d’una nueva masa d’aire fríu va provocar qu’arrecie l’aire y suban transitoriamente les temperatures y la cota de nieve, asina como les precipitaciones.
Mañana sábadu van a xeneralizase los xarabatos que vendrán acompangaos de truena y xarazu principalmente nel llitoral y fastera central asturiana. Por mor del fuerte vientu de componente norte-noroeste, los xarabatos na costa sedrán cortos y espaciaos, tolo contrariu que na cordelera, onde sedrán fuertes y persistentes, amás pasarán sin problemes pa la meseta, llegando inclusu hasta Llión. Les temperatures van descender moderadamente y la cota de nieve surdira perriba de los 500-600m con dalgún desplome nos valles de la cordelera.
El domingu seguirán los xarabatos y precipitaciones con nevaes copioses na cordelera hasta primera hora de la tarde con una cota de nieve que rondará los 600-800m. Pela tarde seguirá lloviendo abondosamente pero les temperatures van dir subiendo asina como la cota de nieve que al finar el día va tar perriba de los 1600m. estendiendose esta situación durante’l riscar y la mañana del llunes pero con un llixeru descensu de nuevu de les temperatures y la cota de nieve. Pela tarde remitirán les precipitaciones y s’abrirán dellos claros.
Otra vegada hai que tar atentos a los ríos nel alborecer del llunes, mientres tantu abellugase del fríu y la nieve, o a esfrutar d’élla, según se mire. Per otru llau muncho precuru colos ádenes en Picos d’Europa los prósimos díes, perriba de los 1800m yá hai muchisima nieve y lo que queda por cayer.
Que paséis una bona fin de selmana collacies ya collacios.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *