Alborecemos col cielu nuboso y xarabatos intermitentes que vienen acompangaos de truena y xarazu nel llitoral , siendo más frecuentes ya intensos na cordelera onde ta nevando copiosamente perriba de los 400m con unes temperatures que ronden los 4ºC, rexistrándose nel puirtu Payares -4,7ºC onde nieva intensamente y se fae obligatoriu l’usu de neumáticos d’iviernu o cadenes.
Güei vamos tener el cielu mui nuboso con precipitaciones abondoses que sedrán en forma de xarabatos y vendrán acompangaos de truena y xarazu nel llitoral y fastera central asturiana con unes temperatures en descensu y cola cota de nieve que rondará los 400m, pudiendo baxar dalgo más na cabecera de los valles. L’aire sedrá del norte-noroeste entovía con raches fuertes nel llitoral y zones altes de montaña.
Mañana xueves el deslizamientu d’una pequeña borrasca ente les altes presiones, nel Cantábricu va a revolver l’atmósfera, dexándonos a partir de la tarde precipitaciones abondoses y fuertes raches de vientu con un ascensu de les temperatures que fadrá que suba la cota de nieve hasta los 1800m anque pue que se caltenga dalgo más baxa na cordelera por mor del fríu acumuláu estos díes y nun suba más haya de los 1500m.
El vienres les precipitaciones sedrán febles ya disperses pela mañana, intensificándose de nuevu al escurecer col pasu de un nuevu frente ente les altes presiones que fadrá que la cota de nieve se caltenga alta, sobre los 1500-1800m.
A partir del sábadu vuelve a enfría cola posibilidá de dalguna gotera a primeres hores que sedría de nieve perriba de los 1200m y col aire sele ya variable con tendencia a ser del nordés
Pa más alantre vamos tener un predominiu de vientu nordés que mos caltendrá les temperatures baxes y la puerta abierta a nuevos temporales pero esto yá lu diremos viendo.
