La Universidá Asturiana de Branu (UABRA) ye un espaciu d’enseñu llingüísticu y cultural intensivu, dirixíu pola profesora y académica Cristina Valdés. Nél, l’Academia —en collaboración cola Universidá d’Uviéu, el Principáu y los conceyos qu’acueyen la programación presencial— ufierta dellos cursos, xebraos en tres categoríes:
- Formación Llingüística Xeneral, de dos selmanes de duración: cursos elemental y avanzáu de llingua asturiana.
- Capacitación Docente n’Eonaviegu, de dos selmanes duración y periodización biañal: los años pares desendólcase’l primer nivel y los años impares el segundu y el terceru.
Cursos d’Afondamientu Cultural y Llingüísticu, d’una selmana de duración, dedicaos a meteries perestremaes: mediu natural, patrimoniu, música, deporte, traducción…
Amás, estos Cursos tienen, pal personal docente de Primaria y Secundaria d’Asturies, la reconocencia oficial de la Conseyería d’Educación del Principáu d’Asturies, darréu de l’acreitación de l’Academia como «Entidá Organizadora d’Actividaes de Formación Permanente del Profesoráu».
UABRA 2023
Los planes propuestos tán pendientes de la tramitación ordinaria na Conseyería d’Educación y na Universidá d’Uviéu. Ta previsto que’l procesu de matrícula emprime’l 12 de xunu de 2023.
Capacitación Docente n’Eonaviegu o Gallego-Asturianu
- Segunda Fase. 60 h. A Caridá (El Franco), del 31 de xunetu al 11 d’agostu de 2023.
- Terceira Fase. A distancia, de setiembre a payares de 2023.
Formación Llingüística Xeneral
- Cursu Elemental de Llingua Asturiana. El Campu (Casu). 60 h, 10 díes de clas ente’l 31 de xunetu al 11 d’agostu de 2023.
- Cursu Avanzáu de Llingua Asturiana. El Campu (Casu). 60 h, 10 díes de clas ente’l 31 de xunetu al 11 d’agostu de 2023.
Cursos d’Afondamientu Cultural y Llingüísticu
- Capacitación pa la traducción al asturianu. El Campu (Casu). 30 h, 5 díes de clas ente’l 31 de xunetu al 4 d’agostu de 2023.
- Anovamientu curricular nel marcu de la LOMLOE (Educación Primaria y Secundaria). El Campu (Casu). 30 h, 5 díes de clas ente’l 31 de xunetu al 4 d’agostu de 2023
- 50 años en movimientu: ámbitos y espacios de desendolcu, normalización y vindicación de la llingua asturiana na historia recién. El Campu (Casu). 30 h, 5 díes de clas ente’l 7 díes y el 11 d’agostu de 2023.
- Recoyida y recuperación de la tradición oral y musical. El Campu (Casu). 30 h, 5 díes de clas ente’l 7 díes y el 11 d’agostu de 2023.
