Les modistes forfuguen los encargos para’l Día’l Traxe’l País, el próximu domingu:
“Va haber mosconos lluciendo *indumentaria calidable”
Raquel Vega Raspia, preparando un pantalón nel so taller de Xixón, ayeri. | S. Arias
Les máquines de coser de los talleres de moda tradicional asturiana tán que nun paran. Y tou porque Grau acueye’l próximu domingu día 26 la quinta edición del Día’l Traxe’l País, una celebración que, dende la so primer edición, consiguió espublizar la conocencia y xenerar un apegu pola ropa asturiana. Por eso, cada añu alleguen más persones a la villa moscona para participar nel concursu “Indumentaria” o, a cencielles, a esfrutar de la xornada festiva con música y danza tradicional. Y los moscones nun se quedaron tras.
“Vien cada vez más xente de Grau. Como tamién se fixo un cursu de confección influyó en que cada vez s’interesen más”, esplica Raquel Vega Raspia, col so taller de Xixón zarráu al públicu, ayeri, pa poder dar salida a tolos encargos. Na mesma situación ta Laura Ruiz González, de Fitoria (Uviéu), ensin pieces n’arriendu y cosiendo ensin parar pa cumplir con toles entregues que tien per delantre esta selmana.
Laura Ruiz González, nel so taller de cordura. | S. Arias
“Anguaño la xente ta bien animada, porque como hubo pocos eventos aprovechen pa encargar ropa”, confirma. Y non yá hai ganes de vistise, la modista uvieina señala que cada vez más xente ta interesada en conocer los distintos usos del traxe, les diverses pieces que lo conformen o’l simbolismu de los colores y teles. Asina, los que se faen el traxe enteru déxense emponer por completu poles modistes, “col estilu y colores que más-yos empresten pero siguiendo siempres una llínea correcta nes pieces y qué va con qué”, detalla.
Per otru llau, los que yá tienen unu o dellos conxuntos apuesten por pieces concretes, más especiales: “Vienen con reproducciones de semeyes antigües y grabaos, son persones que s’interesen en buscar la información sobro la indumentaria”, apunta Vega. Ello ye que suelen ser participantes nel concursu “Indumentaria”, que la so inscripción ta abierta hasta mañana a les 24 hores na páxina web @www.indumentaria.com.es. “Va haber ropa de muncha variedá y va haber mosconos que van llevar grandes traxes, lluciendo indumentaria calidable”, señala Berto Suárez, organizador en collaboración cola Conceyalía de Cultura de Grau.
Celebra l’impactu que tuvo’l Día’l Traxe’l País dende la so primer edición, “creciendo en prestíu y calidá y pol que cada vez s’interesa más xente de fora d’Asturies n’él”. Reveló que tuvieron pidimientos por que sía retresmitíu en directu. Tamién epondera qu’esa puxanza sirve pa poner en valor a los artesanos qu’igüen les teles o faen madreñes, según a les modistes que los cuesen. Una puesta en valor de la indumentaria tradicional asturiana, a semeyanza de la que se vistía a metá del sieglu XIX, que se convirtió nuna fecha marcada en colloráu nel calendariu pa munchos asturianos.
Y el próximu domingu, amás de l’amuesa y concursu del traxe, va haber música y baille con “Andecha Folclor”, “Ambás y Ramsés” y Leticia Baselgas. Dempués d’un 2020 ensin Día’l Traxe’l País pola normativa sanitaria derivada de la pandemia, munchos asturianos volverán llucir con arguyu la indumentaria tradicional en Grau.
