El Colexu Públicu Billingüe Ventanielles celebra’l ‘Oreyines Festival’
Una versión amenorgada de la banda Alberto & García dio’l primer conciertu n’Asturies nel que cuasi naide del públicu llevó mazcarina.
Foi’l conciertu estrella del ‘Oreyines Festival’, un acontecimientu nel Colexu Públicu Bilingüe Ventanielles nel que, daveres, lo esencial foi invisible pa los güeyos. La música púnxose al serviciu de la educación.
Puen facese una idea equivocada acerca del públicu d’esti conciertu. Quiciabes piensen que siendo tan pequeños nun sabríen les lletres de los cantares y de sacar esa conclusión, sedría una conclusión tomada abondo rápido.
Les profesores d’Infantil del centru plantegáronse qué podíen facer pa terminar un cursu que foi tan difícil. Llegaron a la conclusión de que podíen entamar un festival.
Un festival nel que pudieren sonar los animales escondíos qu’hai ente’l públicu infantil.
