- Videu /
Ramu nadal, na parroquia asturiana de Somió, Xixón.
El ramu Nadal (o ramu de Navidá) ye un ornamentu d’orixe paganu recuperáu nos caberos años pel Nadal. N’Asturies, les presencies constataes más antigües tán en Cuñaba, Peñamellera baxa, Cangas del Narcea, ya Ibias.
- Fonte: Wikipedia /
El ramu Nadal, tamién ta documentáu nes provincies d’Ávila, Cantabria, Lleón (onde recibe’l nome de Ramu Lleonés), Palencia, Zamora y Salamanca. La llocalidá abulense de Serranillos, al sur d’Ávila, aínda caltién viva la tradición del «ramo de navidad».
Aspeutu del ramu
N’Asturies, el ramu consiste nuna cadarma de madera de forma triangular, fechu con fueyes de texu, abetu o carrascu[1] nel que s’alluguen 12 veles simbolizando los meses del añu. Del mesmu cuelguen estremaes ofrendes, como chorizos, rosquielles y frutes, asina como elementos ornamentales como filos de llana, puntilles, bordaos. L’armazón principal sofítase nuna vara madera allugada verticalmente con una peana que fai de sofitu pa tola cadarma. Tamién, al pie del ramu, suel ponese un cestu con castañes o nueces. N’otres zones pue ser semicircular o cuadráu.
Historia
Los oríxenes del ramu paecen remontase a dómines precristianes, nes que’l ramu (entendíu como una caña d’árbol en sí) tenía un caráuter votivu como cultu a la fertilidá o como ofrenda a espíritus proteutores, y que se celebra nel solsticiu d’iviernu[5] como preludiu de la primavera. Ye, poro, un símbolu paganu asimiláu pola Ilesia, seique al traviés de les pastoraes (pequeños autos de Nadal que se celebraben nos atrios de les ilesies en Lleón, Zamora, Salamanca y Asturies) y que anguaño tien sitiu ente les celebraciones navidiegues.
