Publicado en Curiosidaes

Respirar y alendar conscientemente…

Dícese de l’acción natural y bonal d’intercambiar gases col ambiente – osíxenu y dióxidu de carbonu- que lleven a cabo tolos seres aerobios col propósitu de llograr enerxía y sobrevivir.

Toles criatures d’esti planeta ALIENDEN y, movides pola intelixencia universal, «remanen» en favor de la evolución. Facenlo, pero nun saben que lo faen. L’humanu sí.

L’humanu ye l’únicu ser -conocíu- que sabe que lo fai. Y amás, tien la capacidá de ser consciente: sabe que sabe que lo fai. Tien ese privilexo.
Pero en llugar d’utilizar esa capacidá para CONFIAR, relaxase y maraviase cola VIDA, enredóse nes sos idees, creyóse un yo», sobeyosu y vanidosu, y piensa que va por llibre, al marxe de la intelixencia universal.

D’esta miente, cayó na inconsciencia. Y agora, siendo un ser consciente, volvióse inconsciente de que ye consciente. Resulta que ye consciente de que sabe que sabe pero nun recuerda que ye consciente de que sabe que sabe.

Asina, la única forma de recuperase» ye volver date cuenta d’ALENDAR.

Alendando conscientemente, vas poder ser consciente de cómo caes una y otra vez na inconsciencia – reacción, compulsión y automatismu-. Pero, siquier, vas ser consciente de que yes un inconsciente -que yá ye enforma-.

Si sigues ALENDANDO, vas empezar a VER la to inconsciencia cada vez más clara y l’inconsciencia
va empezar a eslleise, solo pol pixín fechu de VELA y dexala ensin xulgala.
Si sigues ALENDANDO, vas dir siendo consciente de que tas siendo consciente. Cada vez más.
Si sigues ALENDANDO, probablemente, vas acabar siendo altamente consciente de que yes consciente y podrás sostener gran parte del día, anque de xemes en cuando, vas siguir cayendo na inconsciencia – cuesa que va siguir siendo natural-.

Y si sigues alendando, vas acabar integrando lo que siempres fuisti: un ser consciente, bonal y natural, preparáu y llistu pa VIVIR.
Entós, la to propia sabiduría va faer que te maravíes cola guapura de la VIDA, siendo consciente de que yes consciente de que lo faes.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *