Publicado en Festivales, Música

El pabellón d’Asturies nel Interceltique de Lorient

El pabellón d’Asturies nel Interceltique de Lorient: conciertos, gastronomía, arte y lliteratura

L’espaciu d’Asturies nel LI Festival Interceltique de Lorient garra forma. Les miles de persones qu’acudan al certame bretón nel Année des Asturies van poder visitar el pabellón del país, de 375 metros cuadraos de superficie, onde conocer la música, la gastronomía, l’arte y la lliteratura asturiana, amás d’atopar información turística.

El ser la nación celta a la que se dedica esti añu’l festival permite a Asturies contar con un espaciu esclusivu que sirva d’escaparate de la nuesa cultura. Un escenariu, seis carpes y dos bungalows van instalase na zona central del certame p’acoyer un restorán con una zona pa echar sidra, un puestu de ‘Alimentos del Paraíso’ y otru d’información turística, ente otros, con una inversión total de 200.000 euros por parte de la Conseyería de Cultura, Política Llingüística y Turismu.

Nun festival al rodiu la música de raigañu celta, la música en direuto nun podría faltar nel pabellón asturianu. Llevólu’l Sumiciu, Eva Tejedor & Les Pandereteres, ¿Aú?, Rubén Alba y Nel de Pumea, Algaire, Baxel, La Garrapiella, y Monteavaro, Muñalén & Rodrigues son les bandes que van tocar frente al públicu bretón y los munchos visitantes de fuera de Breizh.

El sábadu 6 d’agostu va entamase amás un conciertu de Mapi Quintana, ‘Música pa tornar páxaros’, dedicáu al músicu Elías García, fináu nel 2019. Va tener llugar en Le Théâtre a les 21 hores y la cantante, xunto con César Latorre, Sonia Cartón, María Sanmiguel, Thomas Welvaadt y Juanjo Díaz, va ufrir un repertoriu compuestu a costafecha pal Interceltique.

Esposición y conferencies

Una esposición va completar l’actividá nel pabellón asturianu. Trátase de ‘Llabor’, de Ricardo Villoria, qu’amuesa la so visión tan personal de la cultura que vivió dende neñu deconstruyéndola pa reconstruyila con una mirada más vanguardista y tresgresora cola que poder trespasar fronteres al traviés de distintos formatos: fotografía, indumentaria y audiovisual.

L’artista llavianés reflexa de cerca la cultura asturiana pa somorguiar al espectador nel so pasáu, entendiendo’l so presente decadente y proyectando la busca d’un sitiu prometedor nel futuru. Otra manera, a lo llargo del festival que tien llugar del 5 al 14 d’agostu, van entamase conferencies y meses redondes d’escritores pa dar cuenta del momentu tan escepcional qu’atraviesa la producción lliteraria nes llingües del país.

La programación oficial

L’Interceltique, na so programación oficial, tamién inclúi una importante presencia d’artistes asturianos. La Banda Gaites Llacín y el Grupo Folklórico Trebeyu van participar n’Horizons Celtiques, les antigües nueches intercéltiques, y en numberoses actividaes a lo llargo de tol certame.

Llan de Cubel y Hevia, que’l xueves 11 van protagonizar la ‘Grande Soirée des Asturies’, Cerezal, L-R, Rodrigo Cuevas y Muga, amás de Silvia Quesada y José Manuel Tejedor, que participen na iniciativa ‘Celtic Odysée’ xunto a músicos d’otres naciones celtes, tamién van tar n’An Orient. El sellu asturianu complétase cola iniciativa Breizh Asturies Project, con Fañch Loric, Nicolas Radin, Leticia Baselgas, la propia Quesada, Mathieu Sérot, Tibo Niobé, Julien Le Mentec y Tudi Cariou, una fusión de fest-noz y nueche en danza, y cola celebración del Trophée Mac Crimmon, pal que se clasificaron los gaiteros Fernando Vázquez, Jaime Álvarez, Daniel Meré y Diego Lobo.

 

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *