Esposición “El vistir”!!La vistimenta tradicional de los asturianos nel sieglu XIX representa un campu con munches posibilidaes d’estudiu y divulgación. El nacimientu del concursu Indumentaria y del día’l traxe’l país, significaron un impulsu mui valiosu pa esta disciplina.
- Fonte:Indumentaria / Indumentaria. Día’l traxe
- III Xornaes Etnográfiques en Grau
- Ojos de Hojalata: web
La collaboración ente’l fotógrafu Ojos de Hojalata y el certame Indumentaria consiguió crear una colección de retratos única sobre vestimenta tradicional asturiana.
La esposición El Vistir axunta por primer vez una selección de treinta semeyes procedentes d’esa galería que valin pa enseñar, con una nitidez total, exemplos que representen maneres acertaes de vistir y interpretar les tipoloxíes del traxe’l país documentaes n’Asturies.
Esta mirada a la ropa de corte tradicional del sieglu XIX complétase con una selección de traxes que tan inspiraos nos datos aportaos pola investigación inédita que’l comisariu de la muestra, Alberto Suárez, ta acabante facer sobre’l vistir en Salcéu, y que ye’l resultáu del estudiu de los protocolos notariales redactaos nesi partíu históricu de Grau que tovía se conserven.
La muestra repara tamién na producción testil del país, enseñando un telar col urdiu y otres pieces rellacionaes colos procesos del filao del llinu y la llana, que proceden de los fondos del Muséu Etnograficu ya de la Hestoria de Grau.
La esposición El Vistir, que protagoniza les III Xornaes Etnográfiques en Grau, compleméntase cola programación d’un taller impartíu por Raquel Vega sobre cómo vistir el traxe’l país, (el 7 de mayu en Los Dolores), y otru nel que Paz Mesa fairá una demostración de los trabayos de la llana, (el 21 de mayu na Casa Cultura). Los dos van empezar a les 17 hores. Nesti últimu equipamientu, primero, el 5 de mayu a les 19:30 hores, va a dar Alberto Suárez la conferencia, El Vistir en Salcéu (1819-1862).
