Esti certame ye unu de los más importante a nivel internacional nel mundu de l’apicultura.
Los productos del Principáu trespasen fronteres y ellí onde lleguen dexen buelga por cuenta de la so calidá. Prueba d’ello, son los mieles que volvieron trunfar nos London Honey Awards. Una reconocencia que se revalida de la mano de Miel LAPUELA. Nesta ocasión, fueron trés les especialidaes d’esta firma del occidente asturianu que recibieron distintivos polos sos escelentes característiques. Trátase de Yérbadu y Carbayu, que dambes recibieron la insinia de platino -el mayor galardón-, y Monte, que foi premiada cola medaya d’oru.
Tamién el miel d´Ería de Valles, allugada en Brañes (Uviéu), foi estremada en dichu certame. Concretamente, fízolo col so miel de castañal, que foi premiada por partida doble. Na categoría calidable recibió la medaya de plata y na d’imaxe, amestada al packaging, tamién llogró la mesma placa.
«Un premiu siempres ye sinónimu d’allegría, sobremanera pola reconocencia que supon al trabayu realizáu mientres tol añu. Trátase d’unos premios que reconocen el valor del nuesu día ente día nel que los nuesos mieles son la resultancia d’un procesu d’ellaboración bien curiáu, dende l’entamu, col tratu de los nuesos truébanos, hasta l’últimu pasu d´empaquetado y unviada. Tou pensáu por que puedas esfrutar de los nuesos productos con toles sos propiedaes intactes», señalen al traviés de la so páxina web dende Miel LAPUELA.
Sicasí, nun ye la primer vegada qu’esta firma asturiana d’apicultura sostenible y comprometida col mediu ambiente, Miel LAPUELA recibe distinciones pola calidá de los sos productos nesti prestixosu concursu. Na edición de 2020 fueron los mieles d’Uz Branu y Castañal les premiaes con oru y plata, respectivamente. El nome de caúnu de los productos vien de les flores de les cualos les abeyes llogren el néctar pa la so ellaboración.
Sobro los premios
Los premios London Honey Awards son unu de los certames más importantes a nivel internacional nel mundu de l’apicultura. Cada añu, reconocen a los meyores mieles, productores, apicultores y distribuidores que fomenten y promueven el so consumu. Valoren tantu la calidá d’esti productu como la imaxe de marca (material de barafuste, innovación, colores y l’imaxe xeneral del productu).
El concursu llevase a cabu por una cata a palpu por un xuráu selectu que realiza un analís organoléptico de los productos que tastia, lo mesmo que de la imaxe xeneral del productu. Esti per un sitiu rexistra xuna calificación numbérica na fueya d’evaluación, que representa’l sentíu xeneral d’esfrute con otros criterios, como l’apariencia, golor, testura, sabor y sensación en boca. Y per otru llau, puntúa la imaxe xeneral del miel y el so empaquetado. Los mieles evalúense en función de les sos propiedaes distintes ya individuales y nun compiten ente sí.
