Alborecemos con cielu nuboso y dellos borrinos y nublines no fonderu los valles con unes temperatures que tan alrodiu de los 12ºC, rexistrándose nel puirtu Payares 5,5ºC.
Güei vamos tener nubosidá abondosa pero malpenes preicpitaciones, sicasí pue cayer dalguna gotera na fastera más ocidental d’Asturies con unes temperatures que sedrán suaves, dexándonos un ambiente chornosu. L’aire sedrá gallegu y pue soplar con dalguna racha fuerte en zones altes ya en puntos del llitoral.
Mañana martes seguiremos con nubosidá abondosa, borrinos y nublines na alborada y posibilidá de xarabatos pela tarde por mor del desendolque de les nubes con un ambiente primaveral ya inestable. Les temperatures camudarán poco y l’aire sedrá sele en xeneral con dalguna racha moderada de vientu gallegu nes zones altes ya en puntos del llitoral.
El miércoles veremos más el sol y les temperatures sedrán más altes pero seguiremos teniendo cierta inestabilidá que pue facer desendolcase a les nubes y dexanos dalguna gotera pela tarde de calter tormenosu. Seguiremos con borrinos y nublines na alborada y l’aire sedrá sele ya varible con un ambiente chornosu.
El xueves tendremos nubes ya claros con unes temperatures en moderáu ascensu, yá de tarde surdirá nubosidá de desendolque que pue dexanos dalguna gotera al finar el día.
El vienres y sábadu tendremos nubes y dalgún xarabatu primaveral con unes temperatures que van caltenese mui suaves y por mor de la humedá y les temperatures altes l’ambiente seguirá siendo chornosu.
Paez que’l domingu tendremos un día seco y soleyeru con un llixeru descensu de les temperatures y un ambiente más prestosu pero esto yá lu diremos viendo.
