Publicado en RTPA, Series

TPA: serie de TV «Tierra de Quesu»

Héctor Braga: Queridos míos, hoy quería anunciaros que mi último trabayu: trátase d´una banda sonora instrumental pala serie de TV «Tierra de Quesu» qu´emite prósimamente TPA. Ver equipu.

Recomendámosvos «Tierra de quesu», un programa nel que participa xente mui querío. Yá vagaba que’l «país de los 40 quesos» tuviere un espaciu na televisión asturiana pa falar d’una de les cultures gastronómiques más bayuroses d’Europa. Ver videu.

El cocineru Lluis Nel Estrada y el realizador Pablo Casanueva conducen esta road movie que percuerre 1500 kilómetros del oriente al occidente d’Asturies, amosando les variedaes, la ellaboración y la vida de los artesanos d’esti productu, tan apreciaú como desconocíu pol consumidor.

La Televisión del Principáu d’Asturies (TPA) emite de magar el miércoles 24 de febreru a les 22:30, Tierra de quesu, una serie documental centrada nel mundu queseru asturianu. Una road movie qu’afonda nes variedaes, na historia y na ellaboración d’esti productu. Tamién nos fala de la vida de los sos productores artesanos y de les dificultaes a les que s’enfrenten. El realizador ribeseyanu Pablo Casanueva dirixe esti proyeutu de cuatro capítulos, conducíu pol cocineru y consultor gastronómicu Lluis Nel Estrada. Esti espertu gastrónomu guía al propiu Casanueva, un mozu profanu nel mundu de los quesos asturianos, más allá de les nociones básiques de les que puede disponer cualquier consumidor, pela xeografía asturiana, percorriendo dalgunes de les munches queseríes artesanales qu’ellaboren esti productu, cada vez más apreciáu pol consumidor, pero tovía enforma desconocíu.

De Peñameyera a Taramundi, Estrada y Casanueva percuerren un total de 1.450 kilómetros en cuatro etapes, nes que van dando a conocer dalgunes de les munches queseríes artesanales que surdieron n’Asturies en dos tiempos. N’una primer dómina o revolución quesera asturiana de magar los años 80 del pasáu sieglu y otra vuelta, na que Estrada denoma como segunda revolución de los quesos artesanales asturianos; de magar la crisis del 2008, cola apaición de nuevos quesos artesanos, queseríes y nueves tendencies tanto a la hora d’ellaborar los quesos como a la de comercializalos, ya incluso consumilos.

Les panorámiques de los impresionantes paraxes naturales qu’arrodien les queseríes combínense colos planos detalle de la cuidada ellaboración d’esti productu: la separación del cuayu, l’amasáu o l’afumiáu. Cada capítulu ta dedicáu a una zona xeográfica: De les Peñameyeres a Maliayo. Los quesos asturianos cerca la mar (la costa), Los Alpes queseros d’Asturies. L’orixe del Beyos, Gamonéu y Cabrales (oriente), El Centru d’Asturies. Los quesos del corazón del país (centru) y De Grau a Taramundi. Onde’l quesu pasa a llamase queisu (occidente).

Amás, tolos episodios cuenten con una referencia gastronómica: recetes, cates o maridaxes de productos relacionaos col mundo del quesu o de la lleche. Tierra de quesu grabóse ente ochobre y payares del 2020.

Asturies tien una de les producciones queseres más importantes d’Europa y sicasí los asturianos conocemos poco más que’l Cabrales, el Gamonéu y l’Afuega’l Pitu

Tenemos una cultura quesera mui potente, con gran variedá y con lleche de muncha calidá, y sentimos la necesidá de treslladar a la sociedá una primer visión d’esti mundu

La serie ta grabada dafechu n’asturianu y foi seleccionada na convocatoria extraordinaria, Asturies crea Sinerxes, desarrollada dende la Oficina de Política Llingüística de la Conseyería del Cultura, pa promocionar la llingua y cultura asturiana y emburriar al sector audiovisual como parte de la industria asturiana.

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *