Publicado en Asturies

Asina yera y asina ye Asturies: 37 años nel túnel del tiempu

 

 

Sobrevolar en 3D el Principáu y reparar cómo se foi construyendo adulces la comunidá ye posible gracies a una nueva ferramienta dixital.

Echar la vista tras y ver cómo yera Asturies fai 37 años yá ye posible gracies a la nueva ferramienta de Google Earth. Al traviés de la función Timelapse, l’usuariu puede sobrevolar en 3D el Principáu y reparar cómo se foi construyendo adulces la rexón. Non solo apréciase l’ampliación del territoriu, sinón que tamién se percibe la edificación d’elementos arquitectónicos y, inclusive, d’espacios culturales. Eso sí, hai qu’apinar un pocu la mirada para estremar bien les construcciones, cuidao que la imaxe nun ye bien nítida nel añu 1984, onde empieza la llínea del tiempu.

Les principales ciudaes asturianes esperimentaron importantes cambeos mientres toos estos años. Uviéu, por casu, aumentó considerablemente la so estensión y foi edificando ya incorporando asina nuevos barrios al mapa. Amás, puede apreciase la construcción del nuevu estadiu de fútbol Carlos Tartiere, según el complexu comercial Calatrava. Tamién l’Hospital Universitariu Central d’Asturies ye de nueva creación.

Pela so parte Xixón, al igual que la capital asturiana, aumentó les edificaciones. D’esta manera, puede reparase como surden nuevos barrios na zona esti y sur de la ciudá, amás de la construcción del Palaciu de Deportes. Tamién ye posible apreciar l’ampliación del equipamientu del puertu d’El Musel o la creación de l’autopista AS-I, más conocida como autovía minera.

De la mesma manera, Avilés amontó l´habitabilidad del so territoriu. Nesti casu, por cuenta de la pixelización y a la escasa calidá de la imaxe nel añu 1984 non puede apreciase perbién en qué zones amontó más les edificaciones. Sicasí, na evolución d’esta villa puede vese cómo surdió d’una de les sos emblemátiques construcciones, el centru *Niemeyer.

La nueva ferramienta, que combina más de 15 millones d’imaxes prindaes nes últimes décades por cinco satélites distintos, ye de bon manexu. Una vegada qu’apuertes a ella esplégase a la derecha una caxa de ferramientes nel que puede indicase el nome concretu del llugar que quier contemplase. Amás, nel encabezáu figura una llínea del tiempu cola que puede xugase. Esta va dende l’añu 1984 hasta’l 2020. Coles mesmes, puede escoyese qué tipu d’evolución reparar: los cambeos forestales, la fráxil guapura del planeta, el calentamientu global, les fontes d’enerxía y l’espansión urbana.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *