Foles de más de seis metros en Xixón y la flota amarrada a puertu ensin poder afaenar. RTPA / Videu Últimu domingu de febreru con envernada n’Asturies. Vientu y la mar bien ximelgada na mariña asturiana. Tampoco faltó l’agua, muncha en Villaviciosa, onde se rexistraron 26 llitros per metro cuadráu, en poques hores.
Situación similar nel conxuntu del Principáu. Hai que tener en cuenta que parte de la precipitación recoyida polos pluviómetros vien del destemple, y non de l’agua. Asturies seguira mañana n’avisu mariellu por fuertes precipitaciones. Tamién en Los Picos d’Europa, la protagonista foi a l’agua.
N’unos Picos d’Europa nos que se rexistraron raches qu’algamaron los 68 kilómetros per hora, nin l’agua nin el vientu amurniaron a quien visitaron Los Llagos de Cuadonga, con bastante menos nieve de la esperada por dalgunos.
Con tola mariña asturiana n’avisu naranxa por riesgu importante de fenómenos costeros, en Cabu Bustu, en Valdés, rexistrábase una racha de vientu de 114 kilómetros per hora, la segunda más fuerte del país. Anque soplara daqué menos, l’airada dexábase sentir en localidaes como Avilés.
Unes condiciones ivernices que se van enfoscar nes próximes hores con nuevos avisos por fenómenos costeros y por nevaes, tantu nel Cordal Cantábricu como en Los Picos d’Europa.
Tamién el mar tuvo bravu mientres tou la fin de selmana. La boya de Xixón rexistró foles de más de seis metros d’altor y l’Aemet preve que mañana puedan algamar los ocho metros. La flota pesquera sigue ensobiada a puertu ensin poder afaenar.
