Estáu del tiempu n’Asturies: xueves 23

Bonos díes, bona xente.

Alborecemos con xarabatos intermitentes que son más intensos ya frecuentes nel interior onde nieva perriba de los 300-400m con unes temperatures que tan alrodiu de los 3ºC, rexistrándose nel puirtu Payares -4,1ºC onde se fae usu obligatoriu de cadenes o neumáticos d’iviernu como nel restu de puertos asturianos.

Güei los xarabatos van dir perdiendo frecuencia ya intensidá a lu llargu de la mañana anque van caltenese durante tol día con unes temperatures en descensu y cola cota de nieve que subirá dalgo nes hores centrales del día, hasta los 500m, baxando de nuevu a últimes hores a los 300-400m. L’aire sedrá de componente norte-noroeste con dalguna racha moderada en zones altes de montaña.

Mañana vienres vamos tener el cielu nuboso pero sin precipitaciones con unes temperatures que van camudar poco o descenderán les mínimes dexándonos un ambiente puramente ivernal, l’aire sedrá sele ya variable.

El sábadu alboreceremos con xelaes importante nel interior asturianu a pesar de que nun va tar el cielu totalmente escampláu, durante la mañana va tar poco nuboso pero a pesar de la llume de sol seguirá fríu. De tarde aumentara la nubosidá y tendremos dalguna precipitación feble y dispersa que sedrá de nieve perriba de los 800m.

Atentos a partir del domingu pela tarde, un nuevu envite de fríu paez que mos pue afeutar al averase una masa mui fría dende centru-eruopa, situación que ye probable que s’estienda hasta’l miércoles, sicasí pol so orixen va ser más bien seca polo que nun s’esperen munches precipitaciones pero si temperatures mui baxes, faciendo que tolo que caiga del cielu seya en forma de nieve en cotes mui baxes que puen baxar hasta los 100-200m, sobre too na fastera más oriental onde les precipitaciones amás sedrán más probables ya intenses. Seguiremos sollertes a esta situación y nes prósimes actualizaciones veremos ver si podemos afinar más colos matices.