Publicado en Feries, Xacobeo 2021, Xixón

FIDMA: El pabellón del Gobiernu, dedicáu a les rutes xacobees, n´asturianu

‘Asturies, Camín al andar’ ye’l nome que se pue lleer en cartelos de grandes dimensiones a la entrada del pabellón del Gobiernu na Feria Internacional de Muestres d’Asturies (FIDMA), qu’abre les sos puertes al públicu’l sábadu. L’asturianu va tener una presencia importante na esposición de mesmu nome, al ser tolos paneles billingües.

Hasta’l día 22 los visitantes al recintu ferial xixonés van poder conocer más sobre les trés rutes xacobees que percuerren el país camín de Santiago de Compostela. Son el Primitivu, el de la Costa y el del Salvador, declaraos Patrimoniu de la Humanidá pola UNESCO nel 2015 dientro de los nomaos Caminos de Santiago del Norte.

L’amuesa rellata momentos históricos d’estes rutes dende’l llugar onde se creo n’orixe, siendo’l primer pelegrín el monarca asturianu Alfonso II el Castu. A esti primer itinerariu, que parte de la catedral de San Salvador n’Uviéu, xunióse pronto’l Camín de la Costa, que va pela mariña asturiana, y el d’El Salvador, qu’usaben los pelegrinos que van pel Camino Francés y opten por desviase hacia la capital asturiana en Lleón.

Tolos paneles son billingües y nellos respétase la toponimia oficial. Complétase l’amuesa ‘Asturies, Camín al andar’ con mapes, fotografíes y un audiovisual nel que los pelegrinos son los grandes protagonistes, y con una réplica de la imaxe del apóstol Santiago que se conserva nel Muséu d’Arte Sacru de Tinéu y con otra del frontal del Arca Santa de la catedral d’Uviéu.

Actividaes culturales:   La Conseyería de Cultura integró na programación del pabellón les siguientes propuestes del programa Asturies, Cultura en Rede:

  • 7 y 8 d’agostu, de 12:00 a 14:00 y de 18:00 a 20:00 hores, Lleendes del Camín, de Guayominí Producciones.
  • 13 d’agostu, de 18:00 a 20:00 hores, y 20 d’agostu, de 12:00 a 14:00 hores, gymkhana dixital El primer pelegrín de Blinca.
  • 14 y 15 d’agostu, de 12:30 a 14:00 hores, Ruta primitiva per Asturies del Camín de Santiago al traviés del vestuariu, de Maite Capín.
  • 16 d’agostu, a les 13:00 y a les 19:00 hores, Pelegrines, de Musa Cafeína.
  • 21 d’agostu, de 18:30 a 20:00 hores, y 22 d’agostu, de 12:30 a 14:00 hores, El Xuglar del Camín, de Carlos Alba.

El pabellón del Gobiernu d’Asturies en Fidma va tar abiertu al públicu del 7 al 22 d’agostu, de 11:00 a 14:00 y de 16:00 a 21:00 hores.

Axenda d’actividaes del programa cultural Xacobéu

Los visitantes tamién van poder fotografiase con una imaxe de grandes dimensiones que simula una parada del Camín de Santiago de la Costa en Corvera y van atopar un espaciu informativu sobre los alimentos asturianos venceyaos a esta tradición milenaria y una pantalla pa consultar l’axenda d’actividaes del programa cultura Xacobéu. Dellos van tener como sede’l propiu pabellón, como la representación de ‘El Xuglar del Camín’, de Carlos Alba, los dos díes últimos de la sesentena cuarta edición de la Feria: el sábadu 21 a les 18.30 y a les 20 hores, y el domingu 22 a les 12.30 y a les 14 hores.

Otra manera, el día 15 va presentase una páxina web con tola información sobre’l Xacobéu y les rutes asturianes, que sirve de complementu a la esposición y que yá se pue consultar n’asturianu, castellanu y inglés.


Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *