Publicado en TIEMPU

Estáu del tiempu: sábadu 5 d´avientu

Alborecemos col cielu cubierto y lloviendo con intensidá, la nieve aparez perriba de los 600m y lo fae copiosamente. Les temperatures tan alrodiu de los 5-6ºC y nel puirtu de Payares rexistrán -3,4ºC, onde se fae obligatoriu l’usu de cadenes o neumáticos d’iviernu como nel restu de los puirtos asturianos, tando peslláos los del Palo, La Marta y el Connio. Nes montañes del ocidente Astur ya superen el mediu metru perriba de los 1000m.

Ayeri’l temporal cebose col llitoral ya prellitoral, sobre too ocidental por mor de la componente del vientu que yera WNW, güei va desplazase al interior sin desaparecer de la costa, al picar l’aire a componente NW., polo que tendremos xarabatos persistentes y abondosos que vendrán acompangáos de truena ya xarazu pela costa y sedrán de nieve perriba de los 600-700m. L’aire calambrión soplará con fuercia en zones altes ya en puntos del llitoral, dexándonos mui mala mar nel Cantábricu. Les temperatures subirán llixeramente anque l’ambiente seguirá siendo mui fríu.
Mañana domingu seguiremos con precipitaciones y xarabatos, anque descenderán en frecuencia ya intensidá pero la nevada seguirá siendo mui intensa nos puirtos altos de montaña con un ascensu llixeru de les temperatures, asina como la cota de nieve que rondará los 700-800m. L’aire seguirá siendo calambrión con raches fuertes nes zones favoretibles.
Durante’l riescar del llunes templará dalgo la temperatura, dándose, paradóxicamente la másima del día pela nueche con precipitaciones ente febles y moderáes que sedrán de nieve perriba de los 1400-1500m, con vientu gallegu que soplará con fuercia. N’alborda volverá a rolar al noroeste, reactivándose les precipitaciones y baxando les temperatures, asina como la cota de nieve, volviendo a nevar copiosamente perriba de los 800-900m, asina tará durante tol día y s’estenderá al martes, onde les precipitaciones sedrán mui abondoses y persistentes, con un nuevu descensu llixeru de les temperatures que fadrá que nive perriba de los 700-800m.
El miércoles tenderá a meyorar dalgo y tendremos xarabatos febles ya dispersos, templando l’ambiente pela tarde cuando subirán les temperatures al entrar vientos atlánticos calecios pol océanu, pero esto ya lu diremos viendo.
Con esti pronósticu, la nevada va ser y ta siendo mui importante na cordelera, con acumulaos mui bultables que tan xenerando y xenerarán munchos problemes nes comunicaciones, amás de los adenes y argayos ya tamién tendremos mui mala mar, con too ello muncho precuru ya tomar les medies oportunes pa minimizar les sos consecuencies. Yá cola vista puesta a lo que puea pasar a partir del xueves, si los vientos atlánticos húmedos ya templaos mos faen un desxelu brusco, agravando les consecuencies del temporal.

Autor:

Maestra de Llingua Asturiana Colexu Carmen Ruiz-Tilve - Uviéu