Publicado en Poesía

Berta P. representa al asturianu nel Institutu Cervantes


Berta Piñan, l’actual Conseyera de Cultura, Política Llingüística y Turismu, va representar a la lliteratura asturiana nun actu del Institutu Cervantes de Frankfurt. Xunto a ella, Leire Bilbao, Àngels Gregori, Raquel Lanseros y Yolanda Castaño.

Col títulu Hablaré otro lenguaje, hecho de acentos más sinceros, versu estrayíu d’un poema de Carmelina Sánchez Cutillas (Madrid, 1927- València, 2009), l’Institutu Cervantes de Frankfurt súmase a la celebración del Día Mundial de la Poesía con un recital en llinia de cinco de les voces más destacaes de l’actual lliteratura castellana, gallega, vasca, catalana y asturiana. «Les trés llingües cooficiales d’España y l’asturianu, dende 2020 llingua oficial de la Xunta Xeneral del Principáu d’Asturies regulada pola Academia de la Llingua Asturiana», espliquen dende l’Institutu Cervantes.

Colos sos poemes, Raquel Lanseros, Yolanda Castaño, Leire Bilbao, Àngels Gregori y Berta Piñán non solo van demostrar que la poesía ta más llena d’entrugues que respuestes, sinón que, al espresase en cinco llingües, van tresmitir cinco sensibilidaes, cinco formes d’asitiase énte’l mundu y de dicir el qué, el cómo y el por qué al manifestar el bon momentu que vive la poesía nes distintes llingües d’España.

La bienllegada al actu va tar al cargu de Raquel Caleya (Directora de Cultura del Institutu Cervantes). La moderación va facela María José Gálvez (Directora Xeneral del Llibru y Fomentu de la Llectura del Ministeriu de Cultura y Deporte).

El Día Mundial de la Poesía, aprobáu pola UNESCO en 1999, celébrase cada 21 de marzu coles mires de sofitar la diversidá llingüística al traviés de la espresión poética. Esta celebración promueve la enseñanza de la poesía, el fomentu de la tradición oral al traviés de los recitales poéticos y dexa a les distintes cultures tresmitir los sos valores, reafitándose na so identidá y restableciendo el diálogu ente la poesía y el restu de manifestaciones artístiques.

La poesía ye una espresión de la diversidá nel diálogu, de la llibre circulación de les idees per mediu de la palabra, de la creatividá y de l’anovación. Contribúi a la diversidá creativa al cuestionar de manera siempres anovada la forma en qu’usamos les palabres y percibimos ya interpretamos la realidá.

L’actividá ye en llinia y pa participar nel alcuentru, el miércoles 24 de marzu a les 19 hores, ye imprescindible unviar un corréu lletrónicu confirmando l’asistencia a cultfra@cervantes.es. Darréu van recibir una confirmación de les sos reserves y l’enllaz correspondiente a la plataforma dixital pa la so participación.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *