«De Madrid al Paraísu»: na estación d’Atocha

Publicado el 04/01/202312/01/2023 por Isa Lobo ツ

El Principáu empecipia en la capital la promoción turística amestada a la llegada de l’AVE.

La estación Puerta d’Atocha Almudena Grandes de Madrid acueye dende esti miércoles la campaña de promoción turística que’l Principáu d’Asturies punxo en marcha para xenerar espectación nel públicu madrilanu énte la próxima llegada del tren d’alta velocidá que va conectar Madrid con Uviéu n’aprosimao trés hores a partir del mes de mayu.

Paraísu natural n’Atocha

Una campaña turística de gran impactu visual colos paisaxes d’Asturies

Los paisaxes d’Asturies amuésense nos 14 ventanales, nes pantalles dixitales y nel soporte publicitariu más importante d’Atocha. La cúpules qu’acompañen los 100 metros de pasiellu pel que lleguen cuasi tolos viaxeros d’AVE del sur y este d’España. L’impactu al baxar de tren ye inmediatu.

‘Paraísu natural: Asturies, cada vez más cerca’. Asina recen, en castellanu, dalgunos de los eslóganes de la campaña colos que se dexa claro que bien llueu podrá viaxase más rápido a Asturies en tren.

Con esta campaña’l Principáu busca resaltar la conexón d’alta velocidá como la nueva ventaya competitiva de la nuesa comunidá.

Un total de 14 ventanales xigantes y delles pantalles dixitales van esibir el mensaxe De Madrid al Paraísu: Asturies, cada vez más cerca, sobro paisaxes del occidente, centru y oriente asturianu, y so imaxes de cielu abiertu que conviden a «volver a lo natural, a l’harmonía, a alendar, a vivir una aventura», ente otros mensaxes motivadores.

La instalación d’esta acción publicitaria, considerada de marketing espectacular pol gran #impactu que xenera na audiencia, ta llevando dellos díes por cuenta de la so complexidá, polo que va llucir completa mañana, según informa’l Gobiernu rexonal. Mientres les próximes hores, la marca Asturies Paraísu Natural tamién va llucir nos 100 metros de barandiella de la cinta tresportadora que trescurre so les siete bóvedes tematizaes cola campaña asturiana na terminal de llegaes de l’Ave.

Esta ye la primera de les acciones previstes pol Gobiernu del Principáu p’aprovechar la ventaya competitiva que va suponer cuntar a partir de mayu cola conexón ferroviaria d’alta velocidá a Asturies. El plan completu va ser presentáu’l próximu miércoles 18 de xineru nel marcu de la Feria Internacional de Turismu (Fitur) que se celebra dende’l 18 al 22 de xineru na cortil IFEMA de Madrid, informa Efe.