Publicado en Ciencia, Muyeres

June Almeida, la viróloga qu’identificó’l primera coronavirus

Procedente d’una familia humilde escocesa que nun podía costear los estudios de la so fía, la vocación ya intelixencia de la brillosa moza dexáron-y superar les torgues económiques. Consiguió llograr la primer imaxe de la hestoria d’un coronavirus, convertiose en doctora y fixo grandes aportaciones al campu de la viroloxía y la microscopía.

June trabayando con un microscópicu electrónicu. Semeya: Getty Images

Con una escasa formación reglada y tan solo 34 años, June Dalziel Hart -qu’adoptó Almeida como apellíu de casada- realizó un descubrimientu que camudaría la hestoria de la viroloxía. Foi capaz de reparar nel microscopiu’l primera coronavirus, bautizáu con esti nome pol halo que lo arrodia y que s’asemeya a la corona solar que tamién puede apreciase na contorna del astru rei. Esta familia formada por distintos virus ataca al sistema respiratoriu provocando enfermedaes leves como un resfriáu o muncho más graves como bronquitis, neumoníes o la famosa Covid-19.

 

 

Aprender trabayando

Considerando la curtia trayectoria estudiantil de June Almeida, yera difícil prever qu’esta moza escocesa desenvolvería una carrera profesional tan esitosa y granible. Nacida n’una familia humilde y trabayadora nel Glasgow de 1930, June tuvo qu’abandonar la escuela a los 16 años per falta de recursos económicos. Afortunadamente, llueu consiguió un trabayo acorde coles sos moliciones na Glasgow Royal Infirmary.

Ellí, foi destinada al departamentu de histopatología, un campu de la medicina que s’encarga d’estudiar les causes, la evolución y les consecuencies de les enfermedaes. Nel llaboratoriu d’esta institución foi onde tuvieron llugar los sos primeros contactos cola observación al traviés del microscopiu electrónicu, aprendiendo a estremar axentes patóxenos nes amueses de texíu biolóxico que tenía d’analizar. Almeida trabayó nel departamentu de histopatología, el campu médico que se dedica a estudiar les causes, evolución y consecuencies de les enfermedaes.

La formación y l’aprendizaxe d’esta primer etapa fueron claves para’l desenvolvimientu posterior de les sos habilidaes como científica. Pasó un tiempu realizando trabayos paecíos nel St. Bartholomew Hospital de Londres, onde conoció a la so pareya, con quien se treslladó a Canadá en 1944. Foi nel Ontario Institute for Cancer Research onde’l so bagaxe profesional empezó a dar frutos.

Gracies a la so esperiencia anterior colos microscopios electrónicos pudo aportar a esta oportunidá, un llugar de trabayu onde publicó los sos primeros artículos científicos basaos en nueves estructures víriques esaminaes por aciu innovadores técniques d’observación microscópica.

Primero que June  diera cola so revolucionaria técnica, el trabayu d’identificación de los virus nel microscopiu resultaba bien complicáu. Los organismos que se reparen son desaxeradamente diminutos y de cutiu costaba estremar y tar seguru de si lo qu’amosaba la lente yera o non un virus. Almeida diose cuenta de que la solución taba nos anticuerpos. Estos tienden a xunise al virus, de cuenta que cuando yeren introducíos nel microscopiu yera la posición de los mesmos anticuerpos la que señalaba ónde s’atopaba’l virus.

Esta técnica supunxo un antes y un dempués pa los médicos que trabayaben cola detección d’enfermedaes infeicioses. Ente otres coses, a ella dexó-y convertise na primer persona qu’identificó nel microscopiu’l virus de la rubeola, una enfermedá bien estudiada hasta’l momentu pero ensin imaxes gráfiques del virus que lu provocaba.

La so creciente fama como reputada viróloga foise espandiendo ente los sectores del mundu académicu y llueu empezaron a llegar les reconocencies. Nesti casu la oportunidá llaboral que se-y presentó proponía-y tornar al Reinu Uníu, precisamente al mesmu hospital londinense onde yá trabayara antes. El doctor David Tyrrel lideraba les investigaciones sobro’l virus del resfriáu común y riquió la presencia de June pa trabayar nel so equipu. Nes sos investigaciones, Tyrrel creía qu’afayara un nuevu tipu de virus, el B814, pero nun yera capaz d’aisllalo y cultivalo nel llaboratoriu. Foi gracies a les técniques desenvueltes pola viróloga que pudo crease una imaxe clara del nuevu virus. El mundu acaba de contemplar per primer vegada un coronavirus al traviés de los güeyos de June Almeida. Tou un finxu na hestoria de la investigación patolóxica.

Este ye l’aspeutu que tien un coronavirus al traviés del microscopiu electrónicu, y asina lo vio June Almeida escontra 1966 cuando trabayaba col Dr. Tyrrel. Semeya: CC Acababa de contemplar per primer vegada n’en la hestoria un coronavirus nel microscopiu.

Tres les sos escepcionales aportaciones, Almeida formalizó los sos estudios con un doctoráu na Escuela Médica de Londres y trabayó nel Wellcome Institute for the History of Medicine de Londres, onde siguió contribuyendo nel campu del llogru d’imaxes microscópiques. En 1980 escribió un testu fundamental tituláu Manual de diagnósticu rápidu de virus nel llaboratoriu pa la Organización Mundial de la Salú (OMS).

Retirose de la viroloxía en 1985 pero, anque se dedicó mientres un tiempu a la yoga y a les antigüedaes, volvió a ella de nuevu pa participar nel llogru de les primeres imaxes n’alta calidá del VIH, el virus que causa’l SIDA. Morrió en 2007 a los 77 años una muyer pionera que’l so legáu y que les sos investigaciones vuelven asitiase na primer llínea de les noticies d’actualidá.

Autor:

Maestra de Llingua Asturiana Colexu Carmen Ruiz-Tilve - Uviéu