Publicado en Sin categoría

Aida Escudero. Premiu de poesía

«Nes últimes xeneraciones hai continuidá colo escrito enantes, nun hai ruptura»

Aida Escudero./JOSÉ VALLINA
Aida Escudero. / JOSÉ VALLINA

Aida Escudero (Uviéu, 1985) recibió’l premiu Fernán Coronas pol llibru agora premiáu y ye autora de ‘Autorretratu con familia al fondu’, Premiu Asturies Xoven.

-¿Pa qué sirven los premios?

-Son importantes pol reconocimientu y sobremanera pa los escritores que tamos entamando. Nos primeros pasos ye fundamental contar con esi reconocimientu, porque nun tienes sensación de la propia valía o si la obra merez la pena, non solo los premios tamién el llabor de la crítica que se fai en revistes como ‘Lliteratura’, de l’Academia.

-El sotítulu: ‘Poemariu neardenthal’ llama l’atención.

-Ye una alegoría, una ficción simbólica na que la voz de la muyer neardhental ye la mio voz y arma esi xuegu de solombres ente pasáu y presente nel que nesti llugar que ye agora nuestru y que foi enantes d’otros, too permanez, ye lo mesmo y solo cambia’l significáu que-y vamos dando.

-Nel so casu dende una mirada de muyer.

-Nun se puede escribir d’otra manera que dende’l puntu de vista d’ún mesmu y la mio esperiencia ta condicionada polos órganos colos que nací, nun queda otra que ver el mundu dende esa perspectiva, la d’una muyer qu’amás tien un plantegamientu feminista.

-¿Cómo entiende la poesía?

-Tol mundu facemos usu de la función poética del llinguax, mesmo na vida corriente hai momentos nos que lo faes: pintando, con poesía o d’otru modu. Pa mi siempre foi más fácil escribir que falar y, porque soi introvertida, tolo que tien que ver col mundu interior más que nes relaciones colos demás. Nesa busca del interior, d’autoconocimientu, ta la poesía.

-¿Cuáles son les sos referencies?

-Soi una llectora mui desordenada y nun hai un modelu que quiera repetir pa mi ye más una busca. En tou casu toos tamos repitiendo modelos porque falamos de los mesmos tópicos lliterarios y los mesmos temes, nun hai munches coses innovadores na escritura nin en nenguna estaya. Tolo que se puede facer son pequeñes axustes.

-¿Ve dalgún rasgu común nes nueves xeneraciones d’autores?

-Nun tenemos el sentimientu de grupu de la segunda xeneracion. Hai una cierta identificación de que nun somos eso, pero ensin unicidá. Pensar que la última xeneración ye la que busca la novedá o más amplitú de mires nun ye real. Lo que s’escribió enantes ye una base y hai una continuidá, nun veo ruptura.

«Too permanez, solo cambia’l significáu que-y vamos dando»

Autor:

Maestra de Llingua Asturiana Colexu Carmen Ruiz-Tilve - Uviéu