Güei ye San Antonio de Padua, unu de los santos católicos más populares. Franciscanu, conocíu pol so gran oratoria atribúyense-y munchos milagros, y considérase-y el santu patronu de los oxetos perdíos y de los que busquen pareya. N’Asturies ye unu de los patronalgos más estendíos de la rexón. Estos díes celebren a San Antonio en Cangues d’Onís, L’Infiestu, Riosa, Villahormes (Llanes), La Pola de Siero, Bezanes (Casu), La Riera (Colunga) y nun llargu ecétera.
Tamién nel muséu caltenemos delles pieces dedicaes a esta advocación como estos dos cuadros que vos amosemos y que podéis ver na capiya del muséu, allugada a la entrada del Muséu de la Gaita, que yera l’antigua capiya de la Casa de los González de la Vega.
