Alborecemos con nubes ya claros o abancios, tando la nubosidá más abondosa na fastera surocidenta y cordelera con unes temperatures mui condicionaes pol vientu ábrigu que sopla con fuercia en munches zones d’Asturies provocando l’efeutu foehn al pasu pela cordelera y dexándonos unes temperatures que tan perriba de los 20ºC, rexistrándose nel puirtu Payares 12,3ºC.
Güei durante la mañana seguiremos con nubes ya claros na mayor parte d’Asturies tando más nublo na cordelera y fastera surocidental. Durante la tarde aumentará la nubosidá nel restu d’Asturies pa dexanos el cielu cubiertu pero sin precipitaciones, sicasí pue cayer dalguna gotera na cordelera. L’aire perderá fuelle nel llanu ,calateniéndose entovía con raches fuertes en zones altes con unes temperatures que camudarán poco.
Mañana xueves dirán ganando terrén les precipitaciones d’oeste a este pero nun sedrá hasta pela tarde cuando se xeneralicen en toa Asturies, amás les temperatures descenderán y l’aire en zones altes sedrá moderado, quedando más seliquino nel llanu.
En el riscar del vienres una potente borrasca va averase al Cantábricu y mos apurrirá un fuerte temporal que vendrá acompangado de precipitaciones abondoses, fuertes vientos con mui mala mar ya un descensu bultable de les temperatures que mos dexarán les primeres nieve nes cumes asturianes. L’aire de componente noroeste seguirá dexándonos durante tol día xarabatos intermitentes ya abondosos, sobre too na cordelera centru-oriental, siendo más dispersos en zones del ocidente. Paez que’l sábadu y domingu pue meyorar dalgo pero esto yá lu diremos viendo.
