Publicado en Teatru

Cuatro obres, finalistes al Premiu Nel Amaro de teatru n’asturianu

La ganadora va decidise tres la representación de toes elles n’ochobre nel Filarmónica d’Uviéu

Cuatro obres d’otres tantes compañíes fueron escoyíes como finalistes del V Premiu Nel Amaro de Teatru Profesional en llingua asturiana o eonaviegu que se va decidir tres la representación de toes elles nel festival que se va llevar a cabu nel Teatru Filarmónica d’Uviéu los díes 1, 8, 15 y 22 d’ochobre.

Les compañíes escoyíes son:

  • El Callejón del Gatu, col espectáculu Grana de cardamomu;
  • Producciones Nun Tris, con La reina la guapura de Leenane;
  • Factoría Norte, con Les piripiripirates con parches y a lo xole,
  • Arte Producciones, con Setiembre.

El gallardón, dotáu con 6.000 euros, convócase col envís d’afitar, arriquecer y prestixar estes dos llingües nel ámbitu del arte dramáticu, y la entrega va tener llugar nuna ceremonia na que va compartir protagonismu con quien llograren los premios lliterarios en llingua asturiana nes categoríes de cómic, ensayu, lliteratura infantil y xuvenil, novela y poesía.

El premiu y el festival lleven el nome de Nel Amaro, autor turonés fináu en 2011, al qu’esti añu se-y dedicó la 42 Selmana de les Lletres Asturianes, y qu’a últimos de la década de los setenta del sieglu pasáu abrió’l camín pa la vanguardia teatral n’asturianu.

Ente les sos obres de teatru destaquen Xénesis o alborá de la concencia (1978), Glayíos nueos, vieya murnia (1979), L’únicu rebalbu (1980) y Antígona, por exemplu, que ganó’l premiu de teatru de l’Academia de la Llingua Asturiana en 1991. Les manes en caxón (2003) foi la so última publicación teatral.

Na edición pasada d’esti premiu, l’espectáculu ganador foi El viaxe de Covaletti, d’Higiénico Papel Teatro.


Premiu Nel Amaro de Teatru Profesional

Nel 2017 convocóse pela primer vez el Premiu Nel Amaro de Teatru Profesional, que se concede a obres yá estrenaes y representaes n’asturianu o en gallego-asturianu. Esti reconocimientu lleva’l nome del escritor Nel Amaro (Quentuserrón, Mieres 1946 – Uviéu, 2011), poeta, novelista y artista esperimental creador del nuevu teatru del Surdimientu.

Al premiu, dotáu con 6.000 euros, puen presentase espectáculos n’asturianu y en gallego-asturianu. Los cuatro finalistes han defender les sos obres teatrales actuando en directo nel Festival de Teatru Profesional Nel Amaro, que se vien faciendo nel Teatru Filarmónica d’Uviéu nel mes d’ochobre.

Ganadores del Premiu Nel Amaro

2017. Llázaro de Tormes, Carlos Alba

2018. Hansel y Gretel, Higiénico Papel

2019. Les rellaciones peligroses, Factoría Norte

2020. El viaxe de Covaletti, Higiénico Papel

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *