Water-polo // A semifinales «Citius, altius, fortius (8-12)»
- Fonte noticia: El Desmarque
- Un conteníu de: Álvaro Ramírez (Tokio)/ Miércoles, 04 d’Agostu de 2021. 08:16
España ta en semifinales del tornéu masculín de water-polo. La selección de David Martín impúsose a Estaos Xuníos nos cuartos de final y robló el so pasaporte a la llucha poles medayes.
El conxuntu español sigui calteniendo una llínea magnífica física y de xuegu, amás d’una alta eficacia n’ataque. Y eso que l’alcuentru énte los americanos foi bastante duru, igualáu hasta’l postreru cuartu, al que llegó con ventaya d’un tanto. Pero a partir d’ende la fortaleza española impúnxose. Fueron más rápidos nes combinaciones, n’armar el brazu (citius), más altos (altius), porque la defensa tan agresiva y contundente, colos cuerpos siempres alzándose sobro l’agua, termina per desesperar a los rivales, como esti miércooles; y más fuertes (fortius), porque perhí rompió’l partíu España al traviés de la engarradiella y de les superioridaes.
España, citius, altius, fortius.
El primer cuartu paecía marcar dende’l principiu la superioridá d’España. Bonos ataques tresformándolos llueu en gol y bones defenses, inclusive n’inferioridá por espulsiones, frenando a los americanos. De fechu l’equipu de David Martín tomó xuna interesante ventaya de 1-3 llueu, anque dos ataques norteamericanos, unu d’ellos en superioridá, devolvieron la igualdá xusto a la fin del primer cuartu.
Nel segundu cuartu España foi a remolque, porque los Estaos Xuníos aprovecharon les sos superioridaes pa tresformales en gol y amás combinaron bien pel interior, de fechu dos goles fueron de palmeos casi na portería y eso que Daniel López salvó unu claru unu contra unu. Los españoles sicasí garrábense al partíu con tiros alloñaos y golazos como los d’Álvaro Granáu, alzáu sobro la piscina pa tomar posiciones de disparu escelentes. Con tollo, l’alcuentru colaron al descansu con empate a seis y cola sensación d’una igualdá máxima en tolos aspeutos.
Namás empezar el tercer cuartu España tomó la delantrera. De nuevu un llanzamientu dende fora de Bernat Sanahuja. Y llegó el momentu de Daniel. El porteru español empezó a apaecer dexando al so equipu siguir per delantre, ensin encaxar, anque depués llegó un tramu nel que’l partíu allorió, anque ensin goles. España esbardió xuna oportunidá con dos espulsiones norteamericanes y depués un contragolpe nel que se bastió. Daqué paecíu pasába-yos a los rivales, daqué aceleraos nos sos ataques énte la presión defensiva hispana. Ente les males decisiones y el meyor nivel defensivu de dambos equipos, lo cierto ye que’l cuartu foise colando ensin apenes anotaciones (6-7), anque l’únicu tantu del cuartu foi español.
Ganó la bola EE.UU al entamu del postreru parcial, y tuvo hasta cuatro ataques consecutivos defendíos de manera escelente pol combináu de David Martín. Respondió l’equipu hispanu con un ataque que foi paráu pol VAR pa dar a España un penalti que-y dexó cobrar por fin xuna ventaya de dos goles nel marcador per mediu d’Alberto Munárriz a falta de 6 minutos. Los norteamericanos respondieron con un gol de Luca Cupido pa retayar distancies de nuevu.
Cada ataque entós convirtióse n’un potosí, como lo foi’l gol de Perrone que dexaba a España de nuevu ampliar la so ventaya. Los cascos azules calteníen un bon nivel físicu y obligaben a EEXX a cometer munches faltes y espulsiones per tantu pa defender, y puestos a defender n’inferioridá yeren meyores los de David que los del otru llau del charcu. Asina llograron caltener la so portería a salvo, col xigante Daniel, y ampliar la so ventaya a trés goles a falta de trés minutos. L’alcuentru acabó per rompese ya inclusive la ventaya aumentó a cuatro goles pa confirmar una de les más clares candidatures a medaya d’estos Xuegos pa España (8-12).
