Publicado en Música, Premios

Yá hai finalistes del XIII Premiu Camaretá al Meyor Cantar

El 27 de payares Avilés va acoyer la gala del XIII Premiu Camaretá al Meyor Cantar, nesta ocasión per primer vez nel Centru Niemeyer. Los cuatro finalistes que van defender el so tema énte’l xuráu son Carla Armas y Rubén García, L-R, ¿Aú? y la Banda Gaites Camín de Fierro.

El Premiu Camaretá al Meyor Cantar, dotáu con 6.000 euros, convocáu pol Gobiernu del Principáu d’Asturies coles mires de consolidar, prestixar y arriquecer la creación musical tanto n’asturianu como en gallego-asturianu.

Ente tolos grupos y artistes que presentaron un cantar propiu n’asturianu o gallego-asturiano espublizáu nel 2020 y los cuatro primeros meses del 2021 –l’anterior edición, ganada por ‘Rambalín’ de Rodrigo Cuevas, tamién incluyía los seis primeros meses d’esi añu amás de tol 2019– éstos foron los cuatro escoyíos. Na gala han interpretar en direuto la so canción de cara a la valoración por parte los espertos seleicionaos pa elixir el merecedor del gallardón, que va llevar una recompensa de 6.000 euros.

Carla Armas y Rubén García van tocar ‘El que conoz a tierra’ (lletra de García); L-R, ‘Veis volver’ (lletra de Leticia González ‘Baselgas’); ¿Aú?, ‘Tomasín’ (lletra de Ruma Barbero); y la Banda Gaites Camín de Fierro, ‘Flacos y ensin peinar’ (lletra de Toli Morilla). Nel momentu de les deliberaciones, va xubir al escenariu Rodrigo Cuevas pa inteprerar dellos temes.

Cola presencia de públicu

Avilés toma’l relevu de Navia como sede de la gala. A diferencia de lo asocedío’l payares pasáu, cuando’l Fantasio acoyó les actuaciones a puerta zarrada, esti añu espérase que’l públicu pueda ocupar los asientos pa disfrutar d’esta iniciativa que tien l’oxetivu de “consolidar, prestixar y arriquecer la creación musical tanto n’asturianu como en gallego-asturiano”.


Los cuatro cantares finalistes son:

  • Carla Armas y Rubén García, con El que conoz a tierra (lletra de Rubén García Martín y música de Carla Armas Junco y Rubén García Martín).

Carla Armas Junco y Rubén García Martín coincidieron per primer vezgada nel Conservatoriu Superior de Música de Salamanca, onde estudiaron Composición, área na que dambos son docentes anguaño; Rubén nel Conservatoriu Superior de Música d’Uviéu y Carla na Universidad Internacional de la Rioxa. Dende 2009 Carla y Rubén participaron en varios proyectos a comuña, consiguiendo también reconocimientos conxuntos pola composición de bandes sonoras pa documentales, cantares pop y proyectos asemeyaos.

  • L-R post-folk asturianu, con Veis volver (lletra de Leticia González y música de Leticia González y Rubén Bada)

L-R ye un dúu formáu por Leticia González (voz y percusión) y Rubén Bada (guitarres eléctriques) que reinterpreta la música tradicional asturiana cola fusión d’nstrumentos estremaos como la pandereta y la guitarra eléctrica. El post-folk-asturianu ye un conceptu creáu pol grupu nel añu 2016, añu de la edición del so primer discu L-R. La idea naz al xunir dos esferes con orixe común: el folk y la música tradicional asturiana. Too ello col envís de revisar los términos dende los que se pensaba la rellación ente tradición y modernidá na música d’Asturies. Veis volver ta incluyíu nel trabayu discográficu N.O.S.

  • ¿Aú?, con Tomasín (lletra de Ruma Barbero y música de ¿Aú?)

El grupu fórmase nel añu 2016 y ta compuestu por cuatro persones veteranes de la música folk asturiana: Ruben Bada (buzuki, guitarra y voz), Ruma Barberu (bodhrán), Marga Lorences (acordión) y Dolfu R. Fernández (violín y voz). Parten de pieces tradicionales y composiciones propies basaes polo xeneral en ritmos asturianos. Pa ello válense de preseos presentes na tradición d’Asturies como l’acordión, el violín y la voz xunto con otros abondo habituales dende va delles décades nos grupos folk como’l buzuki, la guitarra y el bodhrán. Tomasín ye un romance compuestu a la manera tradicional que cunta unos fechos asocedíos nel conceyu de Tinéu nel añu 2011.

  • La Banda de Gaitas Camín de Fierro con Flacos y ensin peinar (lletra y música: Toli Morilla. Arreglos: Sam Rodríguez y Arsenio Ruiz)

Esta banda naz nel añu 2002 impulsada pola Asociación Cultural La Nublina; los sos componentes formáronse na Escuela Municipal de Música de Los Valles del Oso. Nel añu 2012 pubícase el so primer trabayu discográficu 10 años nel Camín col que consiguieron el premiu AMAS na categoría de gaita y el premiu de la crítica RPA a la meyor canción folk. El cantar Flacos y ensin peinar, pertenece a Rock & Fierro.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *