Publicado en Artículos, Nadal, Ver Asturies

El Ramu Nadal

El Ramu de Nadal recupera puxu n’Asturies

Los adornos navidiegos son esa costume tan prestosa cola qu’entamamos a da-y pasu al Nadal. Axuntámonos cola nuesa familia, amigos o compañeros de pisu y preparamos les lluces, l’árbol, el nacimientu… Pero si hai un que presta que tea ganando bien de protagonismu nos últimos años esi ye’l Ramu Nadal.

El Ramu Nadal tien un orixe bien antiguu. Munchos coinciden en que tien un orixe precristianu que nació como una especie de preludiu a la primavera (por eso se facía nel solsticiu d’iviernu), una ofrenda pa los dioses y como cultu a la fertilidá. Ye por esto que se facía con fueyes d’árboles perennes como’l texu o’l lloréu.

Esta tradición acabó tomándola la ilesia y al traviés de les “pastoraes” fíxose bien popular en zones como Salamanca, Zamora, Llión y Asturies. Anque al entamu namás se ponía nos templos ya ilesies pasu ente pasu fueron metiéndose nes cases de la xente d’un mou bien asemeyáu al de los árboles de Navidá.

N’Asturies, el ramu consiste nuna cadarma de madera de forma triangular, fecha con fueyes de texu, abetu o carrascu nel que s’alluguen 12 veles simbolizando los meses del añu. Del mesmu cuelguen estremaes ofrendes, como chorizos, rosquielles y frutes como naranxes o mazanes, asina como elementos ornamentales como filos de llana, puntilles, bordaos. L’armazón principal sofítase nuna vara de madera allugada verticalmente con una peana que fai d’encontu pa tola cadarma. Tamién, al pie del ramu, suel ponese un cestu con castañes o nueces.

Autor:

Maestra de Llingua Asturiana Colexu Carmen Ruiz-Tilve - Uviéu