L’Asociación Cultural Mazcaritos d’Uviéu celebramos esti vienres 1 de marza, de 18 a 20h, l’últimu de los festeyos del Antroxu tradicional, La Vieya del Carbayón, con un pasucais dende’l Campo San Francisco a la Plaza del Carbayón.
La tradición de Partir la Vieya baxo l’arbol tutelar de la ciudá a metanes de la Cuaresma ye parte del llabor etnográfico que facemos pa recuperar l’Antroxu tradicional del Conceyu.
Al entamar l’antroxu plantábase la Vieya nel Postigu, un estafermu de cabeza de burru y trapos de vieya, que quedaba llantada como señal de la fiesta y al acabar enterrábase la Sardina, tradición foriata yá enraigonada na ciudá nel sieglu XIX, cuando subíen les comparses de los barrios baxos y amestábase l’antroxu popular col carnaval burgués, los mazcaritos axuntaben colos disfraces nocherniegos que salíen de los bailles de carnaval del Campoamor o del Círculu Miercantil y na llarga nueche del Martes d’Antroxu celebraben, confundíes les clases sociales nos vapores de la borrachera, la cerimonia irreverente del Entierru la Sardina nel Paséu los Álamos.
Na madrugada del Miércoles de Ceniza acababa la canciana como’l rosariu de l’aurora y al son de les campanes cruciábense les mázcares en retirada coles beates que diben a poner la ceniza a les ilesies de la ciudá. Aportaba la Cuaresma, el tiempu la cuarentena que preparaba la Selmana Santa con ayunu y astinencia pa purgar los escesos del antroxu, y nun se podía comer carne, nin facer música o danza. Pero tornaba otra vuelta la Vieya pagana y folixera. En munchos llugares hai tradición d’una “Vieya Cuaresmera” que permite -por un día- cortar una pata xamón, abrir la barrica o escanciar una botellina sidra. Esto yera lo que se llamaba “Partir la Cuaresma”.
La primer noticia atopémosla nuna gaceta del periódicu El Faro Asturiano, de marzu de 1865, cuando tovía taba en pie’l míticu árbol del Carbayón valtáu en 1879 pa facer la cai Uría y daquella entovía partíen la Vieya. Constantino Cabal cita tamién esa tradición, viva nel Uviéu del sieglu XIX, que xunía la mitoloxía col vezu de partir la Cuaresma. Falaba d’una vieya que salía a la media nueche del Campo San Francisco hasta l’árbol de la ciudá. Poníase a parir embaxo l’arbolón dando gladios y estampanaba con una traca qu’asustaba a los neños. Consolábenlos les madres, que-yos dicíen que yera la Vieya qu’arreventara, pero que nun tovieren miéu, porque la vieyona yera bona xente y dexará-yos dulces embaxo la fueya. Esta tradición local yera una “Vieya Cuaresmera” asemeyada a la Vieya del Monte lleonesa, la Caileach celta o la Anna Perenna romana.
Partir la Vieya yera partir pel mediu la Cuaresma cristiana, representada como una Vieya de tradición pagana. El tiempu d’ayunu y astinencia de los cuarenta díes yera llargono abondo. Les clases pudientes pagaben-y a la Ilesia la Bula de la Santa Cruzada, pero les probes teníen esti día de lliberación que-yos permitía xintar carne, beber sidre o vino, facer baille o armar la comedia. Tamién yera fiesta pa los críos que yeren los que peor aguantaben el tiempu murniu de la cuarentena. Partía la Vieya y tornaba un día de folixa p’animar al pueblu. Anunciábase con voladores y hasta l’arbol tutelar abaxaba la Vieya que metía mieu a la reciella, pero venía cargada con piñata de llambiotaes.
La Vieya del Carbayón recreámosla otru añu más pa que nun se pierda la tradición y puea siguir con puxu l’añu venideru la folixa carbayona. Asina, saldrá la comparsa arrodiando la Vieya xigantona de la Fonte del Caracol del Campo pa dir hasta la placa la cai Uría, recordando l’árbol de la ciudá, y acabar na Plaza del Carbayón, onde se pondrá de partu con piñata pa los “mazcaritinos”.
Prúyenos desplicar a la opinión pública en qué consistía la celebración. Agora que poques families de la ciudá recuerden al árbol tutelar, menos falen n’asturianu pa saber lo que ye un carbayu, y hasta la memoria del Carbayón paez escaecer la función tutelar de la natura sobre’l tiempu míticu d’una ciudá que nun se redime del arboricidiu, recreamos la lleenda d’una vieya y un árbol que parte la Cuaresma con folixa antroxera, y pasa del mieu a l’allegría de la Primavera. Asina convidamos a les que vengan cola reciella a unes llambiotaes de parte la Vieya del Carbayón.
Recuperamos l’añu pasáu una coplina tradicional que se-y cantaba a la nuesa Vieya cuaresmera del Antroxu.
Recoyímosla nun prestosu artículu de don Luis Argüelles, etnógrafu y primer direutor del Pueblu d’Asturies, entituláu: Cuando ‘La Vieya’ se partía en Oviedo bajo el ‘Carbayón’, asoleyáu nes páxines del diariu El Comercio de 1989, lo que demuestra que’l vezu recordábase tovía a finales del sieglu pasáu:
Partióse la Vieya
que diba tranquiella;
la Vieya partióse
baxu el Carbayón.
Partióse la Vieya
fízose cerella;
con esto acabóse
el xixilistrón.
