Publicado en Artículos, Música

La gaita, un símbolu bien nuesu

Falar de la música tradicional asturiana ye falar de la gaita. Al pie de la sidra son dos de los iconos qu’identifiquen la cultura asturiana y les sos más belles tradiciones.

Oríxen y hestoria

Oriente Mediu pue ser l’orixe d’esti preséu y non Europa occidental como se cree. La invasión romana pue ser unu de los causantes de la entrada de la gaita n´Asturies pero nun se toparon fechos arqueolóxicos que lo acoten totalmente. Hasta la Edá Media nun tenemos constancia de la gaita n´Asturies. El capitel de la ilesia de Santa María de la Oliva, del sieglu XIII ye’l primer documentu onde apaez reflexáu esti fechu. Sicasí, rescampla qu’antes d’esa fecha yá se tocaba la gaita n´Asturies. Na sillería de la Catedral d’Uviéu (s. XV) tamién apaez una gaita en pruebes documentales como miniatures o documentos eclesiásticos.

La figura del gaiteru como iconu de la música tradicional asturiana ye clave nel so desenvolvimientu, asistiendo a concursos y xires de gaiteros asturianos tantu pola península como pol restu del mundu.

Estructura de la gaita

Les partes que la componen, son estes:

El soplete, el tubu pol que se sopla para introducir l’aire. El punteru, ye onde van los furacos para tocar les distintes notes. Ye como una flauta. El so peculiar soníu débese a una llingüeta doble llamada payuela o paḥuela.

El roncón, ye’l tubu que produz el soníu bordón, que ta afináu dos octaves (más grave) per debaxo del punteru. Móntase en trés partes, que s´ensamblan: la prima, la tercia y la copa. El soníu roncu #roduzse un pequenu tubu, orixinalmente de caña y na actualidá de fibres sintétiques y n’ocasiones una llingüeta metálica conocida como payón. Quiciabes sía’l roncón la parte de la gaita que más diferencies plantega al respective de los otros tipos de gaites, sobremanera pol númberu d’ellos.

El fuelle, La bolsa que s´apertar por que sala l’aire escontra’l punteru. Siempres fueron de piel pero na actualidá usa piel sintética.

La gaita asturiana nos nuesos díes

La gaita camudó nel so aspeutu y la so funcionalidad dende finales del sieglu XX onde se producieron bastantes cambeos na so estructura, pero la tipoloxía caltúvose. Per otru llau la proliferación de bandes de gaites ye bien destacable. Festivales como’l de Lorient, con casi un millón d’asistentes cada añu, certames dientro d´Asturies, eventos d’importancia onde sale a rellucir esti preséu tan emblemáticu faen que nun se pierda la música tradicional asturiana y el desenvolvimientu de la gaita previendo asina un futuru alentador para un preséu tan antiguu como propiu y queríu.

Autor:

Maestra de Llingua Asturiana Colexu Carmen Ruiz-Tilve - Uviéu