Publicado en TIEMPU

Estáu del tiempu: llunes 30 de payares

Alborecemos con nubosidá alta ya con unes temperatures que tan alrodiu de los 6ºC, rexistrándose nel puirtu Payares 4,3ºC. Güei dirá rolando l’aire al nordés que fadrá que baxen dalgo les temperatures, con nubosidá más abondosa pela mañana, pa dir quedando poco nuboso al atapecer.
Mañana martes alboreceremos con dalguna xelada nes zones más favoretibles, nel cielu tendremos escasa nubosidá pa dir aumentando a lu llargu la mañana ya dexanos el día nuble, amás les temperatures aniciarán un moderáu descensu con aire nordés que pue soplar con dalguna racha moderada en zones altes ya en puntos del llitoral.
Durante’l riscar del miércoles l’aire picará más de norte, apurriéndonos nubosidá baxa abondosa que vendrá acompangada de precipitaciones febles en forma d’orpín, tendiendo a remitir pela mañana, disminuyendo la nubosidá pa quedar escampláu a finar la xornada. Les temperatures mínimes n’ascensu y les másimes en moderáu descensu.
El xueves tará poco nuboso al alborecer con xelaes xeneralizaes nes zones favoretibles, aumentando la nubosidá a lu llargu del día asina como la fuercia del vientu que sedrá gallegu, averándose a los 100km/h al atapecer nes zones altes de montaña ya en puntos del llitoral. Les temperatures camudarán poco o subirán dalgo les másimes.
El vienres camudu radical del tiempu cola llegada d’una masa mui fría ya inestable maritimu-polar que mos apurrirá xarabatos abondosos ya frecuentes, con truena ya xarazu pela costa y nevaes copioses pela cordelera, amás el descensu de les temperatures va ser mui bultable faciendo que surda la nieve tan solu perriba de los 400-500m, too ello acompangáu de fuerte vientu calambrión que fadrá que baxe más la sensación térmica ya tengamos mui mala mar na costa. Esta situación va estendese al sábadu onde continuareos con xarabatos frecuentes y nevaes copioses pela cordelera.

Autor:

Maestra de Llingua Asturiana Colexu Carmen Ruiz-Tilve - Uviéu