La proyección de la bandera d’Asturies nel Palaciu de Presidencia abre la conmemoración del 25 de mayu de 1808, cuando la Xunta Xeneral declaró-y la guerra a la Francia de Napoleón Bonaparte. Per vegada primera vamos celebrar un actu institucional que se va celebrar cada añu, yá que naquellos acontecimientos ta l’orixe de la nuesa bandera.
L’actu, en concreto, va celebrase nel Palaciu Conde Toreno cola presencia de Marcelino Marcos, presidente de la Xunta Xeneral; l’alcalde d’Uviéu, Alfredo Canteli; y una representación de l’Asociación de Amigos del País de Asturias y de l’Asociación de Recreación Histórico Cultural de Asturias (ARHCA), según informó Europa Press.
«Hemos recordar cómo respondió #Asturies nos episodios de mayu, cuando tola sociedá conocida temblaba: faciéndose ama del so destín con rebelión, enfotu y audacia, avanzando camín de la frontera nueva d’un mundu económicu, social y políticu nuevu». Adrián Barbón
Amás va proyeutase esta nueche la bandera, que s’adopta nesi llevantamientu, nel que’l pueblu asturianu declárase soberanu al traviés de la Xunta Xeneral, a partir d’una propuesta de diseñu de Gaspar Melchor de Xovellanos décades atrás, na fachada de Presidencia. Conceyu Bable recuperóla na década de los 70, hasta ser adaptada pol Gobiernu, que la oficializó nel 1990.
La llamada ‘Cruz de la Victoria’, qu’afata la bandera asturiana, nun ye un homenaxe a la lleenda que se cunta sobro’l rei Pelayo y la Batalla de Cuadonga (722), sinón a los fechos hestóricos acaecíos nel mes de mayu de 1808, cuando la Xunta Xeneral del Principáu declaró-y la guerra a Francia.
La creación de la bandera remontase a los acontecimientos del 9 de mayu de 1808. Tres la llectura d’una carta que narraba los eventos del llevantamientu del 2 de mayu, el pueblu enfureciu empecipió la insurrección contra Napoleón; convirtiendo aquel mes de mayu n’unu de los más aturbolinaos de la hestoria del Principáu. Los mariscales de Napoleón respondieron cola orde del fusilamiento de 58 uvieinos recluyíos poles revueltes d’aquel día.
El 25 de mayu, a otru día al asaltu de la Fábrica d’Armes d’Uviéu, la Xunta Xeneral del Principáu crea l’exércitu d’Asturies y sofítase nes sos nueves fuerces aliaes: l’exércitu británicu. Sicasí, a pesar de cuntar con más de 9.000 soldaos y 595 oficiales, el Principáu inda nun tien xuna bandera que la representara, polo qu’empecipiaron la creación d’una.
«Con esti signu protexeré al piadosu, con esti signu venceré al enemigu» foi’l lema propuestu por Xovellanos, quien nun informe históricu, redactó les característiques de la primer bandera del Principáu. En dichu documentu, l’ilustráu propón que’l fondu sía tantu de color coloráu como azul, anque ésti postreru acaba siendo’l más reconocíu y usáu. Tamién suxure l’usu de la insinia que fuera utilizada polos reis ástures n’antaño: ‘la Cruz de la Victoria’.
De los brazos d’esta cruz mariella cuelguen les lletres griegues alfa y omega, que simbolicen el principiu y el fin de toles coses. La versión de bandera que foi a la guerra estremábase tamién pola inscripción «Asturies xamas vencida», qu’acabó sumiendo col pasu de los años. Con esta insinia y estos colores los soldaos asturianos fueron a la guerra y llucharon hasta algamar la victoria final.
La oficialidá d’esta nun llegó hasta l’añu 1990 cuando s’aprobó la Llei de la bandera coles característiques de la versión actual.
