Publicado en Cómic, Dexónos

Dexónos Quino, creador de Mafalda y unu de los dibuxantes n’español más internacionales

Esti miércoles finó Joaquín Lavado, más conocíu pol so llamatu y pseudónimu: «Quino». Creador de la inolvidable Mafalda y unu de los dibuxantes n’español más internacionales. Les sos certeres palabres viaxaron a entrambos llaos del Atlánticu gracies a les sos viñetes y el so peculiar sentíu del humor. Desenvolvió les aventures el so personaxe más popular ente 1964 a 1973, anque les sos historietes retrucáronse en tol mundu hasta l’actualidá. Foi galardonáu col Premiu Príncipe d’Asturies de Comunicación y Humanidaes y la Medaya de la Orde y les Lletres de Francia. Vamos recordalu poles sos hestories, la so mirada crítica y de reflexón de la sociedá al traviés d’una neña que ye inspiración de delles xeneraciones.

Esta reproducción de Mafalda esta permanentemente nel Campu de San Francisco n’Uviéu. Inauguróla Quino cuando vieno recoyer el Premiu Príncipe d’Asturies actual Premio Princesa d’Asturies, en 2014.

 

Un 29 de setiembre de 1964 empezó a esplublizase la tira humorística «Mafalda». Ye una de les historietes más populares de l’Arxentina y foi traducida a más de 30 idiomes. Ver «10 frases de mafalda para recordar».

Tien 6 años y odia la sopa. Pórtase como cualquier neña de la so edá, pero tamién tien una mirada aguda y curiosa sobro’l mundu y la vida. Interésase polos problemes del mundu, como la guerra, la fame o’l racismu. Cuando pide esplicaciones a los adultos, les sos entrugues son siempres directes y desarmaes, hasta pa dar llugar a un ataque de nervios, tratáu con calmantes “Nervocalm”.

Nacencia de Mafalda:  Un trabayu inicial como dibuxante publicitariu conduciólu a crear a Mafalda en 1962 gracies a unes llavadores y unos frigoríficos. A Quino encargaron-y una publicidá que consistía n’ellaborar tires risibles para los diarios nes que s’amosara en dibuxos la vida d’una familia qu’utilizaba los electrodomésticos Mansfield. Y de esa secuencia fonética surdió’l nome de Mafalda.

Queríu Quino, esti mundu tan complicáu qu’habitamos te va echar de menos. N´Uviéu, vamos curiar de Mafalda, que yá se convirtió en seña d’identidá de la ciudá. Y nun-y daremos sopa, prometíu. Fuelga en paz.

Autor:

Maestra de Llingua Asturiana Colexu Carmen Ruiz-Tilve - Uviéu