Publicado en TIEMPU

DOMINGU 18 D’OCHOBRE DEL 2020


El tiempu n´Asturies

Bonos díes, bona xente. YE TIEMPU DE CASTAÑES YA SIDRE DEL DUERNU. Bienveníos al Tiempu n’Asturies collacies ya collacios, n’esta páxina vos convidamos a conocer xuntos, la maxia de la meteoroloxía n’Asturies, onde’l borrín y la nublina difuminen un horizonte siempre inciertu ya interesante.

Alborecemos col cielu empuercáu de nubosidá alta con unes temperatures que tan alrodiu de los 9ºC, rexistrándose nel puirtu Payares 7,5ºC.

Güei otru día seliquino que vamos tener, con nubes altes entemecides ente dellos claros, peronde van colase los rayinos de sol , caleciendo abondo l’ambiente al mediudía, con unes temperatures másimes que van superar los 20ºC na mayor parte d’Asturies, amás l’aire seguirá siendo feble ya variable con predominiu de la componente sur.

Mañana llunes va a entamar a entranos aire ábrigu, coyendo fuelle a lu llargu’l día con raches mui fuertes en zones altes de la cordelera durante la tarde. Esti aire va empobinanos nubosidá media-alta que sedrá más abondosa nel surocidente asturianu ya cordelera, onde tendrán precipitaciones, nel resto quedaremos al abellugu del «muru» dexándonos la nubosidá más rota y faciendo l’efeutu foenh al pasu per ésti, con unes temperatures másimes que superarán ampliamente los 20ºC.

El martes les baxes presiones nel noroeste facilitarán el pasu d’un potente frente altlánticu que regará abondosamente la península d’oeste a este, siendo les precipitaciones más abondoses en Castiella ya’n cara sur de la cordelera, asina y too n’Asturies esta vegada tamién tendremos lluvies abondoses durante tol martes, con un descensu de les temperatures másimes pero con un ascensu de les mínimes que van dexanos un ambiente suave pero húmedu. L’aire perdera fuelle quedando sele ya variable con dalguna racha moderada en zones altes de montaña.

 

 

Sábadu 17 d’ochobre del 2020. ANALÍS DE LA EVOLUCIÓN ATMOSFÉRICA PA LOS PRÓSIMOS 15 DÍES.

La prósima quincena se va caracterizar por una circulación zonal media que va permitir que baxes presiones mos afeuten pel Atlánticu, apurriéndonos una sucesión de frentes entemecidos ente tiempu más estable.

Agora tenemos un vórtice polar dividíu en dos, con altes presiones dominando la fastera central del árticu, tando desplazáu’l vórtice principalmente hacia Euroasia ya outru cachu más pequenu al árticu canadiense.

Pero col trascursu los díes el chorru polar va dir coyendo fuercia, llindando’l fríu ya compactando’l vórtice, sin divisiones nin malpenes ondulaciones nel casquete polar. Al finar la selmana ya tendremos un mapa típicu d’una circulación atmosférica zonal.

Un chorru polar potente, impide l’intercambiu de mases ya malepenes s’ondula’l vórtice polar, situación típica d’una curculación zonal. Asina y too la circulación zonal va ser media, colo que podrán afeutanos les baxes presiones peronde circularán los frentes atlánticos.

Autor:

Maestra de Llingua Asturiana Colexu Carmen Ruiz-Tilve - Uviéu