Publicado en Día de...

El Día de les Llibreríes celebrará’l próximu 11 de payares

Dempués de diez ediciones, el Día de les Llibreríes quier consolidase nel imaxinariu llector y a partir d’esti 2021 escueye fecha fixa nel calendariu. L’artista sevillanu Guridi foi l’encargáu d’afigurar nel cartelu l’ideariu d’esta edición, personalizando la relación que se produz ente llibreros y llectores al traviés de la invitación a lleer.

Con actividaes por tol territoriu, otra de les novedaes ye que per primer vegada va ufiertase un 10% de descuentu a toes aquelles persones que celebren esti día al pie de les sos llibreríes de cabecera. Esta celebración produzse nun ambiente d’optimismu, una y bones la previsión ye terminar l’añu con una crecedera de les vientes cimera a un 15 %.

Cola elección d’una fecha fixa nel calendariu, cola ufierta d’un 10% de descuentu, y con actividaes por tol territoriu, el Día de les Llibreríes torna’l próximu 11 de payares pa reivindicar, un añu más, el so calter cultural, de comerciu de proximidá, puntu d’alcuentru físicu con los llectores y de fomentu de la llectura.

Promovida pola Confederación Española de Gremios y Asociaciones de Llibreros (CEGAL), col sofitu de la Dirección Xeneral del Llibru y Fomentu de la Llectura del Ministeriu de Cultura y Deporte, la campaña d’esta celebración empecipia col espardimientu del cartelu realizáu pol artista Guridi pa esta undécima edición.

La ilustración amuesa “les figures de dos llibreros, muyer y home, que nos abre la mente a partir de testu ya imaxe. Son dos personaxes anónimos que’l so propósitu ye contribuyir a qu’abras los güeyos, dos personaxes que soporten el pesu y la responsabilidá de que lleamos al traviés d’una ufierta, un gran llibru que representa a tolos llibros. Nun m’interesaba representar el llugar físicu de la llibrería sinón les persones que la habiten y lluchen por sobrevivir día ente día contra los xigantes de la rede”.

Raúl Nieto Guridi (Sevilla, 1970), autor de más de 70 llibros, traducíu a más de 12 idiomes, docente y collaborador d’ONGs y asociaciones culturales, personalizó la relación que se produz ente llibreros y llectores al traviés de la invitación a lleer.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *