Siete murales de cerámica repartíos peles cais de Colombres guíen a les families per una ruta cenciella
La ruta de los siete murales de cerámica de los emigrantes a les Amériques ye un paséu lliterariu, visual y patrimonial por dalgunos de los requexos más desconocíos de la capital ribedense. El percorríu ye cenciellu, afayadizu pa les families con neños, porque les ilustraciones del dibuxante Alfonso Zapico van captar l’atención de los más neños de la casa. Asina lo cunta Mónica Balmori, guía turística y directora de la oficina de Turismu de Ribedeva.
Los paneles cunten la hestoria d’una familia cualesquier que, entós daquella, emigró a les Amériques pa salir de la probitú. Les imáxenes de los murales van complementaes colos testos lliterarios de la escritora y periodista d’estos Servicios Informativos, Aitana Castaño.
La marcha, el viaxe, la llegada, el trabayu, la señardá, los suaños y la vuelta son dalgunos de los capítulos desenvueltos pa dar a conocer les vivencies d’aquellos emigrantes a decenes de miles de kilómetros de la so población d’orixe.
Precisamente, los 7.308 kilómetros faen referencia a la distancia qu’hai ente Colombres y La Habana, ente’l suañu d’unos pocos, el de los indianos, y la probitú de la gran mayoría, los de les maletes al agua.
