La Sardina del Antroxu xixonés yá ta «enlatada» na so residencia de Xixón y yá activó les sos redes sociales @sardinantroxu2021 (Instagram) y @sardinantroxu xixon (Facebook) na primera de les actividaes en formatu dixital coles que se va celebrar un «non-Antroxu» marcáu poles restricciones impuestes pol andanciu de la covid-19 ente esti xueves d’Antroxu y el día 16 de febreru, Martes d’Antroxu.
Na tarde del xueves la Sardina participó amás nel alcuentru virtual (zoom) cola Tertulia Feminista Les Comadres. Coles mesmes, la web de Festexos amuesa dende estos díes conteníu rellacionáu col Antroxu llocal. Un vidéu de la Sardina, una galería de semeyes de la so “enlatamientu” domiciliariu, amás d’otres galeríes rellacionaes col antroxu de Xixón y d’Asturies. Fotografíes, cartelos y una selección d’imáxenes escoyíes nel archivu del Muséu del Pueblu d’Asturies qu’inclúi imáxenes del antroxu n’Asturies dende 1900. La web va ser actualizada acaldía con nuevos conteníos.
Sol lema del cartelu d’anguaño, «Esto nun ye’l Antroxu de Xixón” -, el festexu d’Interés Turísticu Rexonal tuvo que se reinventar pa prescindir de la organización, dende Divertia, de toa actividá que suponga concentración de persones y d’esta manera suspende’l pregón, les actuaciones musicales, el desfile y los concursos d’antroxos y charangues. Coles mesmes, tampoco se va decorar, nin se va allumar el Paséu de Begoña.
Va caltenese sicasí la tradición d’antroxar la estatua de Pelayo (en fecha ensin determinar y n’horariu nocherniegu pa evitar presencia de públicu). Otru de los protagonistes, vía on-line, va ser Agustín, (Alberto Rodríguez), el conocíu presentador del Concursu de Charangues, que tien previstu ufiertar vídeos y conexones tanto na web, como tamién nes sos redes sociales.
Les charangues tamién van tener protagonismu nesta web mientres l’Antroxu, yá que caúna grabó un vidéu pa la ocasión y tamién van participar en distintos “directos” cola Sardina al traviés de les redes sociales.Divertia tamién va abrir esi espaciu virtual mientres el Antroxu a el xixoneses y xixoneses pa qu’unvien les sos fotografíes y se conecten nos directos ufiertaos pola Sardina nel so perfil de Instagram.
Al igual que n’años anteriores Divertia plantegó, xunto a OTEA, la promoción de los tradicionales Menús d’Antroxu, nesti casu pa recoyer nos chigres o pa pidir a casa. La mesma Sardina va pidir un menú de Antroxu a la so residencia y va ufiertar delles recetes del citáu menú nes sos redes sociales.
