LA CABANA DE ROBECOS DE LA SIERRA L´ARAMO GOCIA DE BONA SALÚ.
- Fuente: Riosa , Paraiso Natural
Esta mañana xubimos a L´Angliru (Riosa) para allugar correchamente dalgunos de los topónimos del trabayu que tamos a puntu de terminar (la tercer parte) para dempués #publicar. Baxemos pol Xangueñal, pasamos la Vega la Xanzana, la Vega’l Pozu y cuando averábamos al Valle’l Portillín, recibimos una prestosa sorpresa. Dos fataos de robecos pastiaben plácidamente, unu de más de TRENTA EXEMPLARES na parte baxa de la fastera del Gamonal y otru más pequenu d’unos DIEZ O DOLCE, na base del Picu Zarreo.
Creyí que, namás decatase de la mio presencia, saldríen n’escorribanda, pero nun foi asina. Siguí averándome y para nun asustalos caltuvi posición discreta y a distancia. A pesar de faer un arrogante día de sol, la temperatura yera baxa -ente 3 y 4 graos – y el vientu soplaba fuerte. Gracies que diba bien arropáu y llevaba guantes y un verdugu». Nun yera fácil caltener la cámara en posición. Les semeyes inda, pero dalgún vídeu que sacamos paecía un caballu llocu. Les fasteres norte de los picos inclusive la redolada del Llagu L´Angliru teníen xuna perpequeña capa de nieve.
Los robecos gocien d’una salú arrogante, como podéis ver nes semeyes, y si yá falen d’una cabana de más trescientos, viendo lo que vimos güei, llueu va ser muncho mayor. Amás, los que vimos güei, tán gordos y fuertes. Lo que nos llamó l’atención foi que la capa de los del fatáu más pequenu yera muncho más escura.
El robecu ye una de les especies más característiques de la Rede Natural d’Asturies. 🐐Esta especie tremendamente axilosa, habita sobro los riscos caliares del altu monte cantábricu. Nesti ecosistema’l robecu ye xuna especie clave nel caltenimientu del paisaxe y de les comunidaes vexetales subalpines.
🐐Mientres el branu alcuentrense nes cotes más altes, baxando nel iviernu a zones asitiaes na llende cimera del monte una vegada que l’alimentu faise más escasu o les condiciones climatolóxiques más adverses. Y, mientres los últimos díes d’ochobre y primeros de payares tien llugar el celu del robecu onde los machos engarren por consiguir reproducise. 🐐La so actividá ye diurna y ye fácil atopalo pastiando a primer hora del día.
