- Fonte: InfoAsturies.com / Alberto Rodríguez/gráficu /Asturies.com /
- “Conocimientu del asturianu nos ámbetos urbanos. Uviéu, Xixón y Avilés”,
- Enllaz https://alladixital.org/avance-de-resultaos-del-estudiu…/
El conocimientu del asturianu nos ámbetos urbanos medró 18 puntos nos caberos trenta años, la metá de los asturianos urbanites tien bonos conocimientos llingüísticos y cerca’l 90% quier l’asturianu nos planes d’estudiu.
- El 89,2 por cientu de los encuestaos quier al idioma na escuela
La encuesta, fecha pol equipu ASEP, encuestó a más de 500 persones de más de 16 años, 192 d’Uviéu, 240 de Xixón y 68 d’Avilés y consistió nun test de conocimientu de llingua, mui asemeyáu al fechu nel 1991, y nuna encuesta sobro posicionamientu respeuto a la llingua.
Del test de conocimientos los investigadores desprenden que’l conocimientu medró nun 18% respeuto a los resultaos de la primer Encuesta Sociolingüística d’Asturies, que data del 1991. Cuasique la metá, el 49,4% de los encuestaos, demostró tener un nivel afayaizu d’asturianu, de los qu’un 22’6% presenten un nivel bien altu de destreza llingüística. Los resultaos son meyores n’Avilés que’n Xixón y Uviéu.
En cuanto a posicionamientu, destaca la desapaición cuasi completa del estigma llingüísticu, con namás un de ca diez encuestaos que piense que falar asturianu ye “falar mal”. La tresmisión interxeneracional meyora tamién, con un 54% reconociendo l’asturianu como llingua materna, con un altu 34% que la identifica comu llingua materna esclusiva. L’89’2% sofita que s’incluya l’asturianu en tolos planes d’estudiu ya’l 26% deseya que tolos asturianos foren billingües. El 70% reclamen pal asturianu un tratu istitucional análogual d’otres llingües propies d’otros territorios dientro l’Estáu español.
Tou ello, tres décades de desprestixu, discriminación, ataque y desenfotu istitucional de la llingua, indica un altísimu enfotu de los asturianos -tamién los de les ciudaes- por caltener viva la so llingua, daqué que tamién queda espeyao na encuesta, con namás un 12% que considera que la clas política asturiana fae “lo que puede” por meyorar la situación llingüística. Nun podemos escaecer tampocu la emportancia de l’aportación a esti conocimientu debía al enfotu d’adautación demostráu polos emigrantes llegaos a Asturies dende otros países -especialmente los vinientes de Sudamérica y de países del Este) que suponen ya más d’una cuarta parte de los escolinos que cursen llingua nos cientros escolares.
Los encuestaos n’Avilés amosaron mayor capacidá llingüística n’asturianu que los d’Uviéu y Xixón. Ye más, lideraron caúna de les pruebes entamaes nel cuestionariu llingüísticu.
Uviéu asítiase en segunda posición, mentes que Xixón rescampla por un mayor porcentaxe d’usu diglósicu, apunta l’estudiu. Les dos ciudaes altérnense siempre en tolos indicadores (fenómenos fónicos d’identificación visual d’oxetos n’asturianu, fenómenos léxicos d’identificación de conceptos n’asturianu, fenómenos léxicos d’identificación asturiana de significaos y fenómenos sintácticos de diferenciación de rexistros asturianu/castellanu) y namái nún, fenómenos morfolóxicos d’identificación de xiros n’asturianu, Avilés y Xixón rivalicen nos máximos en cuasi tolos xiros.
Mayor escolarización
«La razón tenemos que vela, pero hai dalgunes implicaciones que tenemos de contestu. Una ye que los niveles d’escolarización son mayores n’Avilés», apuntó Llera Ramo, qu’añadió que «si’l nivel d’escolarización ta dos o trés puntos perriba yá ye mui significativu», amás d’esistir un «mayor nivel de movilización, porque los que deciden escolarizar son los padres de los guaḥes».
