El presidente del Principáu, Adrián Barbón, anunció ayeri que “en pocos díes” va empecipiar los contactos colos grupos de la Xunta “que creen nel Estáu autonómicu” p’acometer la reforma del Estatutu d’Autonomía, que’l próximu mes d’avientu cumple 40 años de vixencia.
El cambéu que Barbón quier encetar implica, como midida más relevante, instaurar la oficialidá de la llingua asturiana.
L´últimu día d´Asturies ensin Oficialidá
Nun añu nel que se conmemora’l 40 aniversariu de la celebración del accesu del pueblu asturianu a l’autonomía, quepe llevar a cabu una reflexón sobro l’Estatutu y el so, esperemos, próxima reforma.
¿Qué ye l’Estatutu d’Autonomía? Ye la norma institucional básica que regula’l funcionamientu y réxime de l’alministración del Principáu d’Asturies, reconocida pola Constitución Española nel so artículu 147. Tien rangu de Llei Orgánica (7/1981, de 30 d’avientu).