La marca Puru Remangu acaba d’editar el llibru ‘Güeli’, que recueye delles histories «d’heroínes anónimes», de muyeres «qu’hasta agora nun salíen nos llibros». Histories escrites polos nietos pa «nun escaecer d’ónde venimos» y «conocenos meyor y valorar el remangu de les muyeres asturianes», indiquen dende Puru Remangu.
La obra naz de la iniciativa #30DíesConRemangu, un proyectu, abiertu y participativu a tolos siguidores d’Instagram, que publicó a lo llargo del mes de marzu la historia d’una ‘güelita’. Agora, con ‘Güeli, histories d’amor y remangu’ eses vides pasen al papel al traviés de 35 histories, dalgunes yá conocies y otres inédites que nun salieron na iniciativa #30DíesConRemangu. Preciu: 13 €
«Les histories de toes estes muyeres merecíen pasar al papel y d’esta forma poder llegar a muncha más xente que nun ta nes redes sociales», afirmen dende Puru Remangu, p’añadir que tamos énte un llibru «d’aventures emocionantes, d’heroínes anónimes, histories de superación, romances, dalgún qu’otru drama y munchu remangu».
‘Güeli’, un llibru dedicáu a les güeles asturianes
El testu recueye 35 nomes de muyeres valientes y decidíes. Vides marcaes en munchos casos pola Guerra Civil. Identidá, feminismu y normalización llingüística son dalgunes de les pilastres qu’encontaron la iniciativa y que trescalen les páxines del llibru.
