Publicado en NATURA

Los pexes canten a l’amanecida, según un estudiu australianu

Un nuevu estudiu confirma la variedá de soníos qu’emiten hasta 800 especies marines. Al igual qu’ente los páxaros, el soníu xuega un importante papel na vida de los pexes.

Un artículu recién de la revista New Scientist reseña los afayos d’un grupu d’investigadores de Curtin University, en Perth, Australia. Mientres 18 meses, los espertos rexistraron la vocalización de pexes nes agües costeres de Port Headland, al occidente d’Australia.

Les vocalizaciones, similares a gurníos y runfíos, xueguen un papel vital nos comportamientos de los pexes, incluyendo reproducción, alimentación y defensa del territoriu. Esencialmente, asina ye como los pexes comuniquense ente sí.

Los pexes nocherniegos usen les llamaes para caltener al grupu xuníu mientres caza y los pexes diurnos usen para defender el so territoriu. Acordies con los científicos, los soníos emitíos polos pexes cumplen funciones similares a aquellos emitíos poles aves.

Robert McCauley, unu de los investigadores, señala: «Tuvi escuchando’l parllotéu de los pexes mientres casi 30 años ya inda me sosprienden cola so variedá. Apenes tamos empezando a apreciar la complexidá arreyada y a tener una idea rudimentaria de lo que ta asocediendo nel ambiente acústico submarín.

Anque inda tenemos enforma qu’aprender sobro la vida marina, xuna cosa ye cierta: los pexes y otros animales acuáticos son seres sensibles, capaces de sentir dolor. Amás, pueden esperimentar prestar de manera similar a los perros, los gatos y otros animales».

Si’l fechu de que los pexes sían sensibles nun ye motivu suficiente pa dexar de comelos, l’amenorgamientu de les poblaciones marines por cuenta de la esplotación pesquera tendría de selo.

Un informe del Fondu Mundial pa la Naturaleza y la Sociedá Zoolóxica de Londres revela que’l númberu de pexes y otros animales acuáticos cayó un 49% ente 1970 y 2012 por cuenta de la sobrepesca.

Yá sía pa evitar el sufrimientu de los animales o pa protexer los nuesos océanos, puedes esaniciar el to sofitu a la cruel y destructiva industria pesquero dexando a los pexes fora del to platu.

Por Mara Temez

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *