Bonos díes, bona xente.
Alborecemos col cielu poco nuboso ya con unes temperatures mui variopintes condicionaes por mor de la iversión térmica orográfica, nes zones deprimies poco ventilaes tan alrodiu de los 4ºC, nes zones al vendestate del vientu sur lleguen a los 16ºC.
Güei un día más vamos tar perriba de los valores térmicos normales pa estes feches del añu, sobre too en zones altes y fastera sur d’Asturies, onde’l vientu ábrigu va facese nortar más, baxando abondo la humedá relativa del aire. Con esto, desgraciadamente, yá se tan produciendo nunmerosos incendios y la situación paez que pue dir a peor. Nel cielu van dir surdiendo nubes altes y l’aire ábrigu dirá coyendo puxu a lu llargu del día nes zones altes de montaña con unes temperatures que van seguir siendo mui altes.
Mañana sábadu primer día del añu la situación va camudar poco, sicasí la nubosidá sedrá más abondosa pudiendo dexanos el día nuble con vientu de componente sur que va soplar con raches fuertes en zones altes de montaña con unes temperatures que camudarán poco dexándonos un ambiente mui suave.
El domingu y el llunes seguiremos con vientu de componente sur y temperatures altes col cielu empuercáu de nubes medies y altes entemecides ente dellos claros, nun sedrá hasta’l martes col role del vientu a componente noroeste cuando llegue la lluvia que vendrá acompangada d’un descensu de les temperatures y dalgo de nieve pela cordelera pero esto yá lu diremos viendo.
