Publicado en TIEMPU

Estáu del tiempu: Sábadu 6 de febreru 2021

Bonos díes bona xente.
Alborecemos col cielu cubiertu y precipitaciones persistentes con unes temperatures que tan alrodiu de los 7°C, rexistrándose nel puirtu Payares -0’8°C, onde ta nevando.

Güei durante la mañana seguiremos con precipitaciones abondoses y persistentes que van dir remitiendo a partir del mediudía, con unes temperatures que siguen en descensu, asina como la cota de nieve que rondará los 900-1000m. Al atapecer puen abrise dellos claros remitiendo percompletu les precipitaciones. L’aire del norte con tendencia a rolar a gallegu.
Mañana domingu alboreceremos ente nubes y claros ya xelando nes zones favoretibles, con un aumentu de la nubosidá a lu llargu la mañana ,pa dexanos precipitaciones pela tarde que sedrán febles en xeneral, más abondoses na fastera ocidental, aumentando la fuercia del vientu gallegu con raches fuertes al finar el día nes zones altes de montaña ya en puntos del llitoral.
El llunes vamos tener nubosidá media-alta con dalguna gotera que sedrá más frecuente y abondosa na fastera surocidental, con aire gallegu baxu y temperatures n’ascensu.
El martes vuelven les lluvies xeneralizaes a partir de la tarde con un nuevo descensu les temperatures ya con nieve pela cordelera.
Y el miércoles y xueves templará con nubosidá media-alta y dalguna racha de vientu molestu nes zones de montaña.
Ya sois munchos los que táis pidiendo sol y paez qu’a partir de la fin de selmana vamos entrar n’un periodu d’estabilidá, agora ta por ver si con fríu y xeláes o con temperatures primaverales, siendo la escepción d’Europa porque se va conxelar, pero esto ya lu diremos viendo.

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *